Традыцыйная рэспубліканская прафілактычная акцыя МНС “Канікулы без дыма і агню” праходзіць у раёне. У рамках яе ратавальнікі РАНС правялі вучэнні ў летнім лагеры, што размясціўся ў школе вёскі Стараселле.
У паўнамаштабных вучэннях прынялі ўдзел усе дзеці, якія знаходзяцца ў лагеры на адпачынку.
Спачатку для іх выхавальнікаў быў праведзены падрабязны інструктаж, загадзя размеркаваны абавязкі пры надзвычайнай сітуацыі: напрыклад, хто адказвае за выклік ратавальнікаў, сустракае іх і распавядае аб здарэнні. За ходам трэніроўкі сачыў начальнік РАНС Віталь ВОРАНАЎ.
Па легендзе, пажар узнік на другім паверсе школы, але ў якім менавіта памяшканні, невядома. Спрацаваў сігнал трывогі, і дзеці разам з выхавальнікамі і іншымі работнікамі былі паспяхова эвакуіраваны з будынка. Дзяцей пералічылі, каб пераканацца, што ўсе пакінулі лагер.
Праз лічаныя хвіліны на месца здарэння прыбылі ратавальнікі Старасельскага паста РАНС. Хутка разведалі, што здарылася, і пачалі прадпрымаць меры па ліквідацыі меркаванага ўзгарання. Колькі хвілін – і справа была зроблена. Рабяты ўвесь час з захапленнем сачылі за дзеяннямі пажарных.
Пасля для падвядзення вынікаў вучэнняў усіх удзельнікаў запрасілі ў актавую залу.
– Былі некаторыя недахопы ў працы як з боку работнікаў лагера, так і ратавальнікаў, – адзначыў падчас збору Віталь Воранаў. – Напрыклад, не ўдакладнілі, ці адключана электрычнасць у будынку па прыбыцці на месца. Але ў астатнім спрацавалі добра.
Ад Машчаніцкага сельвыканкама школе быў уручаны каштоўны падарунак, у тым ліку і новы прыбор АПА.
Гульню ў асацыяцыі, звязаныя з выратаваннем, правяла з дзецьмі інспектар ГПіУГ РАНС Кацярына ЛЮБІВАЯ. Таксама разам з ёй рабяты вучыліся правільна выклікаць пажарных, паглядзелі некалькі тэматычных мульцікаў, а потым адправіліся на вуліцу, дзе мерапрыемства працягнулася. Там дзеці змаглі трапіць у кабіну пажарнай машыны, пазнаёміцца з яе ўнутраным абсталяваннем. З задавальненнем прымяралі шлемы і маскі з рэспіратарамі, якімі штодзённа карыстаюцца ў сваёй рабоце ратавальнікі.
А завяршэннем мерапрыемства стала любімая дзіцячая забава, якая заўсёды выклікае ў маленькіх гледачоў вялікае задавальненне, – дэманстрацыя тушэння пажару вадой пры дапамозе пажарнай машыны.
Алена БЫКАВА.
Фота аўтара.
