Дзіцячая бяспека вышэй за ўсё!

У рамках рэалізацыі дзяржаўнай палітыкі ў сферы папярэджання надзвычайных сітуацый прыроднага і тэхнагеннага характару, прапаганды ведаў у галіне бяспекі жыццядзейнасці, прыцягнення моладзі да аказання садзейнічання органам і падраздзяленням па надзвычайных сітуацыях Рэспублікі Беларусь, РК ГА “БРСМ” і РАНС праводзяць сумесную акцыю “Летні патруль”. Днямі яны завіталі ў дзіцячы аздараўленчы лагер з кругласутачным знаходжаннем “Перамога”, які функцыянуе на базе Старасельскага ВПК ДС ПШ.

З 24 чэрвеня туды заехала другая змена ў складзе шасцідзесяці школьнікаў. І, паколькі дзеці знаходзяцца там дваццаць чатыры гадзіны ў суткі, будынак павінны цалкам адпавядаць патрабаванням пажарнай бяспекі, а работнікі лагера – у любую хвіліну быць гатовымі да ўзнікнення надзвычайнай сітуацыі, незалежна ад яе складанасці, і прыняць неабходныя меры па яе ліквідацыі ў самы кароткі час. А самае галоўнае – не разгубіцца і выратаваць тых, за каго яны 18 дзён нясуць адказнасць.

Як распавёў начальнік РАНС Віталь ВОРАНАЎ, на базе лагера створана добраахвотная пажарная дружына, у склад якой уваходзяць дзесяць чалавек.

– Гэта людзі, якія ў выпадку ўзнікнення пажару павінны першымі забяспечыць выклік пажарных падраздзяленняў, эвакуіраваць усіх, хто знаходзіцца ўнутры будынка, і прыняць меры па першапачатковым тушэнні пажару да прыезду ратавальнікаў, – дадаў Віталь Валянцінавіч.

Каб праверыць гатоўнасць членаў ДПД на практыцы, ратавальнікі правялі з імі вучэбную эвакуацыю з выклікам пажарных падраздзяленняў, адпрацоўкай дзеянняў на выпадак узнікнення пажару.

– Калі палічыць колькасць дзяцей, якія адпачываюць у лагеры, персанал, то гэта каля сотні чалавек. Зразумела, што кіраваць натоўпам у экстранай сітуацыі даволі складана, таму мы і праводзім такія вучэнні, каб члены ДПД не разгубіліся ў масе людзей і змаглі дакладна ведаць свае дзеянні, – адзначыў Віталь Воранаў.

Пасля эвакуацыі інспектар ГПіУГ РАНС Кацярына ЛЮБІВАЯ ў рамках акцыі “Канікулы без дыму і агню” пагутарыла з рабятамі аб бяспецы ў лесе і на вадзе, прадэманстравала ім навучальны мультфільм “Правілы паводзін на прыродзе”.

– Дзеці хутка і правільна адказвалі на пытанні, была бачна іх тэарэтычная падрыхтоўка, – адзначыла інспектар. – Самае галоўнае, што кожны з іх ведае, як выклікаць ратавальнікаў, што сказаць дзяжурнаму РАНС падчас званка, таму ўпэўнена, што яны не разгубяцца і ў надзвычайнай сітуацыі.

Таксама Кацярына Любівая падкрэсліла: практыка паказвае, што ў гульнёвай форме дзеці лепш засвойваюць патрэбную інфармацыю.

Ад інспектара РАНС і в. а. першага сакратара РК ГА “БРСМ” Марыны ШАБУСАВАЙ выхаванцы лагера атрымалі прафілактычныя лістоўкі “Канікулы без дыму і агню”, якія абавязкова прачытаюць у вольны час.

Напрыканцы сустрэчы ратавальнікі далі дзецям магчымасць пабываць у пажарнай машыне, ацаніць яе магутнасці, прымерыць спецыяльнае абмундзіраванне.

Марыя БАРАНАВА.

Фота аўтара.