Урачыстыя лінейкі з пачаткам новага навучальнага года прайшлі ва ўсіх школах Бялыніччыны
Урачыстыя лінейкі з пачаткам новага навучальнага года прайшлі ва ўсіх школах Бялыніччыны і сталі сапраўдным святам для ўсіх дзяцей.
Навучэнцаў, студэнтаў, аспірантаў, настаўнікаў і навукова-педагагічных работнікаў з Днём ведаў павіншаваў кіраўнік дзяржавы Аляксандр Лукашэнка.
“Гэтае свята дарагое кожнаму. Яно прыходзіць у наша жыццё з першым званком, застаецца з намі назаўжды лепшымі ўспамінамі пра школьнае дзяцінства і студэнцкае юнацтва, працятае пачуццём падзякі да любімых настаўнікаў за набытыя ў гэты перыяд веды і вопыт”, – гаворыцца ў віншаванні.
У сувязі з тым, што сёлета Дзень ведаў выпаў на нядзелю, урачыстыя лінейкі па ўсёй краіне адбыліся 2 верасня. А тэмай першага ўрока для ўсіх школьнікаў стаў радок з верша Янкі Купалы “Маладая Беларусь”: “Занімай, Беларусь, маладая мая, свой пачэсны пасад між народамі!”.
На ўрачыстай лінейцы, што прайшла ў СШ № 1 імя М. І. Пашкоўскага, павіншавалі вучняў, іх бацькоў, педагогаў старшыня Дзяржаўнага пагранічнага камітэта Беларусі генерал-маёр Анатоль ЛАПО, кіраўнік раёна Васіль ЗАХАРЭНКА, начальнік аддзела па адукацыі райвыканкама Жанна ЗВЯГІНА, дырэктар установы Таццяна БАЛДЫШЭЎСКАЯ. Анатоль Пятровіч і Васіль Аляксеевіч таксама ўручылі школе каштоўныя падарункі, а першакласнікам – буквары.
Для вучняў 8 в класа настаўніца Алеся БУНАКОВА правяла ўрок мужнасці “Мы гэтай памяці верныя”, удзел у якім таксама прынялі упраўлення ідэалагічнай работы пагранкамітэта краіны падпалкоўнік Генадзь ЗЫКУН, ваенны камісар аб’яднанага Бялыніцкага і Круглянскага ваенкамата маёр Мікалай ГАМОЛКА.
Міхась КАРПЕЧАНКА.
Фота аўтара і Святланы МАГІЛЕЎЧЫК.