З вамі на дарозе дзеці
Пры вялікай колькасці станоўчых эмоцый і яркіх уражанняў цёплы перыяд года характарызуецца як найбольш небяспечны і аварыйны для юных пешаходаў, веласіпедыстаў і пасажыраў.
Бескантрольныя паводзіны іх на дарозе могуць прывесці да непапраўных наступстваў. Гэтым летам у Магілёўскай вобласці дарожная трагедыя адняла адно дзіцячае жыццё. Траўмы і калецтвы атрымалі яшчэ 20 непаўналетніх.
Бядой скончылася паездка на скутары для 15-гадовага падлетка ў Шклове 1 жніўня. На 119-м кіламетры чыгуначнага перагону Шклоў-Копысь ён сутыкнуўся з цягніком. У цяжкім стане падлетак быў дастаўлены ў бальніцу. Высветлілася таксама, што вадзіцельскага пасведчання ў хлопца не было.
Пры разглядзе фактаў ДТЗ з удзелам дзяцей вынік напрошваецца сам: абсалютная большасць аварый, у якіх яны гінуць і атрымліваюць траўмы, на сумленні дарослых, самых блізкіх людзей – бацькоў.
5 жніўня ў 2-х ДТЗ у Магілёве і Асіповіцкім раёне пацярпелі дзеці-пасажыры. У абодвух выпадках іх перавозілі з парушэннем ПДР.
З пачатку года на тэрыторыі Магілёўскай вобласці адбыліся 28 ДТЗ, 1 дзіця загінула, 27 атрымалі траўмы.
На момант ДТЗ у 12 выпадках дзеці былі пешаходамі, 8 – пасажырамі, 7 – веласіпедыстамі і адзін непаўналетні пацярпеў як вадзіцель. Па віне саміх дзяцей адбыліся 7 аварый.
Галоўнай прычынай непрыемных здарэнняў на дарозе з’яўляецца бескантрольнасць з боку дарослых. У сілу сваіх узроставых і псіхалагічных асаблівасцей развіцця дзеці вельмі непрадказальна сябе паводзяць, не ўмеюць прадбачыць небяспеку, якая чакае іх на вуліцы і дарозе.
Калі ваша дзіця пайшло ў першы клас, то некалькі разоў прайдзіце разам з ім маршрут ад школы і назад, звярніце ўвагу на ўсе небяспечныя моманты, якія могуць сустрэцца на шляху. Бяспека дзяцей на дарозе шмат у чым залежыць і ад вашых паводзін. Менавіта ад бацькоў дзеці вучацца намнога хутчэй, чым ад іншых дарослых.
Адметная роля ў захаванні дзіцячай бяспекі на дарозе адводзіцца таксама і вадзіцелям, іх уменню загадзя прадбачыць небяспеку, калі на праезнай частцы або побач з ёй з’яўляюцца дзеці.
Не трэба ігнараваць элементарныя меры бяспекі і пры перавозцы непаўналетніх у аўтамабілях, бо пры ДТЗ менавіта яны становяцца нявольнымі заложнікамі сітуацыі.
Пакуль не прыдумана больш простай і надзейнай абароны дзяцей у аўтамабілі, чым аўтакрэслы. Яны каштуюць грошай, але лепш сэканоміць на цацках і салодкім, чым на бяспецы ўласных дзяцей.
Аляксандр ЕМЯЛЬЯНАЎ,
інспектар АДАІ РАУС.