Словы пісьменніка за мір

Больш за 70 майстроў слова з Беларусі і Расіі сабраў пленум пісьменнікаў Саюзнай дзяржавы, які адбыўся ў Магілёве 3-4 кастрычніка.

На мяжы Мінскай і Магілёўскай абласцей, паблізу вёскі Карытніца, членаў праўлення ГА “Саюз пісьменнікаў Беларусі” гасцінна, з традыцыйным бялыніцкім караваем, сустрэлі супрацоўнікі РЦК. Начальнік аддзела ідэалагічнай работы, культуры і па справах моладзі райвыканкама Іна ІГНАТОВІЧ і кіраўнік пісьменніцкай дэлегацыі, першы намеснік старшыні СПБ, Алена СТЭЛЬМАХ абмяняліся прывітальнымі прамовамі.

У Бялынічах творцы пазнаёміліся з гісторыяй горада, планамі падрыхтоўкі яго да Дня беларускага пісьменства.

У Магілёве пленум пісьменнікаў Саюзнай дзяржавы прайшоў пад знакам дзвюх дат – 75-годдзя вызвалення Беларусі ад нямецка-фашысцкіх захопнікаў і 20-годдзя падпісання Дагавора аб стварэнні Саюзнай дзяржавы. Лейтматыў сустрэчы – словы пісьменніка за мір ва ўсім свеце.

Першы дзень пленума прайшоў у Палацы культуры вобласці, у фае якога разгарнуліся тэматычныя выставы. Назаўтра пісьменнікі наведалі шэраг прадпрыемстваў Магілёва, а таксама прафесійны агралесатэхнічны каледж імя К. П. Арлоўскага. Напрыканцы свайго знаходжання ў горадзе на Дняпры творцы ўсклалі кветкі на мемарыяльным комплексе “Буйніцкае поле” і да памятнага каменя Канстанціну Сіманаву.

                             Міхась КАРПЕЧАНКА.

                             Фота аўтара.