Напрыканцы верасня Прэзідэнт Беларусі Аляксандр ЛУКАШЭНКА падпісаў указ аб узнагароджанні жанчын ордэнам Маці. Сярод тых, хто ўдастоіўся высокага звання маці-гераіні, бялынічанка Вольга ПАЛУЯНОВІЧ-КАРНЕЕВА.

Ёсць такая ўсходняя прытча: чалавек папрасіў у Бога стварыць для яго цуд і той паказаў, як нараджаецца дзіця. Сапраўды, з’яўленне на свет дзяцей – гэта цуд.

А што можа быць гераічнага для жанчыны-маці, падумаеце вы, калі гэта і так яе прызванне ў жыцці? Уявіце сабе, што жанчына, якая носіць дзіця, цалкам адказная за яго, аддае яму часцінку сябе, свайго здароўя, маладосці і прыгажосці. І пасля нараджэння немаўляці шматлікія клопаты прыпадаюць у першую чаргу на долю яго маці. Таму і не дзіўна, што мнагадзетных жанчын па праву можна лічыць гераінямі. У большасці выпадкаў менавіта на іх плячах ляжаць шматлікія жыццёвыя пытанні.

Гераіня гэтага выпуску рэдакцыйнага творчага праекта Вольга Палуяновіч-Карнеева пераехала ў Беларусь з Казахстана. Наша краіна вельмі спадабалася ёй, а яшчэ менавіта тут яна сустрэла свой лёс – вішаўчаніна Сяргея Палуяновіча.

Паколькі ў бацькоў яна была адзіная, заўсёды марыла аб вялікай сям’і. Жаданне мець шмат дзяцей з радасцю падтрымаў і яе муж.

– Нашаму старэйшаму сыну, Вячаславу, споўнілася 12 гадоў, Мікіту – 11, Дзіму – 9, Ксюшы – 5, а самаму маленькаму, Максімку, хутка будзе два годзікі, – распавядае Вольга. – Дзеці растуць вельмі дружнымі, не крыўдзяць адзін аднаго, разам ім цікава. Тым больш, у іх хутка з’явіцца яшчэ адзін брацік ці сястрычка.

Сям’я Палуяновічаў актыўна далучаецца і да грамадскага жыцця раёна. Прымаюць удзел яны і ў спартакіядах, якія праводзяцца на базе ФАКу “Друць”, у сямейных мерапрыемствах, што арганізуюцца ў БУКП “Жылкамгас” (там працуе Сяргей). А сёлета ўсе разам удзельнічалі ў раённым конкурсе “Мнагадзетная сям’я – 2019”, дзе занялі ІІІ месца.

З клопатамі аб сваёй вялікай сям’і Сяргей і Вольга спраўляюцца разам і адзінагалосна сцвярджаюць, што ім не цяжка.

– Карыстаемся тымі льготамі, якія прадастаўляе дзяржава, – дадае мнагадзетная маці. – А яны даволі-такі адчувальныя! Мы пабудавалі трохпакаёвую кватэру пры дапамозе дзяржпадтрымкі, хутка атрымаем аднапакаёвую. Харчаванне ў школе, карыстанне падручнікамі для нашых дзетак бясплатныя… Дый усяго не пералічыць.

Калі жанчына даведалася пра тое, што яе ўзнагароджваюць ордэнам Маці, усхвалявалася і абрадавалася.

– Гэта ўзнагарода – вялікі гонар для нашай сям’і, – кажа Вольга. – Зараз у нас будзе пацвярджэнне таго, што выхоўваем дзетак правільна, а ў іх будзе яшчэ адна нагода ганарыцца сваёй маці.

Святлана МАГІЛЕЎЧЫК.

Фота з архіва сям’і Палуяновічаў.