Выхавала сына дастойна
Падзяку Міністра ўнутраных спраў Беларусі Юрыя КАРАЕВА атрымала маці ўчастковага інспектара РАУС Кірыла НАВУМАВА.
Ганаровую ўзнагароду і кветкі ва ўрачыстай абстаноўцы ўручылі Але Маркаўне начальнік упраўлення аховы правапарадку і прафілактыкі Магаблвыканкама Дзмітрый ПАРКАЎ і намеснік начальніка РАУС па ідэалагічнай рабоце Міхаіл НЯМЫЦЬКА.
Дзмітрый Паркаў ад імя міністра МУС і сябе асабіста падзякаваў жанчыне за тое, што годна выканала свой мацярынскі абавязак, яе сын узорна нясе службу ў райаддзеле міліцыі.
Кірыл Навумаў вырашыў застацца на сваёй малой радзіме, зараз ён служыць участковым інспектарам міліцыі ў Цяхцінскім і Запольскім сельсаветах.
– У мяне трое дзетак, – гаворыць Ала Маркаўна. – Старэйшыя сыны заўсёды марылі звязаць свой лёс з сілавымі структурамі. Кірыл ажыццявіў сваю мару і працуе ў міліцыі, а Канстанцін паспяхова будуе кар’еру вайскоўца. Я рада, што дзеці дастойна служаць роднай краіне.
З высокай узнагародай Алу Навумаву павіншавалі таксама працаўнікі Цяхцінскага сельсавета, бібліятэкі і школы аграгарадка.
Святлана МАГІЛЕЎЧЫК.
Фота аўтара.