Восень праводзілі прыгожым футболам

Некалькі гадоў запар у кастрычніку на стадыёне ў аграгарадку Вішоў збіраюцца аматары футбола, каб закрыць сезон “вялікай” гульні.

Гэтыя восеньскія футбольныя баталіі прысвячаюцца памяці былога дырэктара Вішоўскага СЦК і ВЧ Аляксея ЧУДАКОВА, які шмат паспрыяў развіццю спорту ў аграгарадку.

Прызы і кубкі пераможцам па традыцыі прадаставіла праўленне СВК “Калгас “Радзіма”.

Падчас напружанай барацьбы паміж камандамі на футбольным полі разгарнулася захапляльнае відовішча. Кожная з чатырох каманд-удзельніц паказала выдатную гульню.

У выніку, 1 месца заняла каманда “Памяць”, 2-е – “Юнацтва”, трэцімі сталі футбалісты каманды “Радзіма”, спартыўная дружына “Школьнік” апынулася на 4 месцы.

Лепшым бамбардзірам прызнаны Ігар ПАЗНЯКОЎ (“Памяць”), варатаром – Андрэй БАРАНАЎ (“Радзіма”). Лепшым абаронцам вызначаны Кірыл ЕЛІСЕЕЎ (“Юнацтва”), а адзінаццацікласнік Вішоўскай СШ Рыгор КАРПЯНКОЎ (“Школьнік”) стаў лепшым іграком спаборніцтваў. 

Акрамя кубкаў і памятных падарункаў усе каманды атрымалі прыемны бонус ад СВК “Калгас “Радзіма” – па пакеце яблыкаў і груш.

                                 Уладзімір ДУДАРАЎ,

                                 інструктар па спорце СВК “Калгас “Радзіма”.