Для сваёй краіны і народа

Дэпутатам Палаты прадстаўнікоў Нацыянальнага сходу Рэспублікі Беларусь сёмага склікання па Шклоўскай выбарчай акрузе № 90 выбраны Андрэй Аляксандравіч ГАНЧУК, 20 сакавіка 1979 года нараджэння, старшыня Бялыніцкага раённага Савета дэпутатаў, беспартыйны, жыве ў г. Бялынічы.

На пасяджэнні Магілёўскай абласной выбарчай камісіі, якое прайшло 19 лістапада бягучага года, разгледжана пытанне “Аб устанаўленні вынікаў выбараў дэпутатаў Палаты прадстаўнікоў Нацыянальнага сходу Рэспублікі Беларусь сёмага склікання ў Магілёўскай вобласці”.

Было адзначана, што выбары адбыліся ва ўсіх 13 акругах Магілёўскай вобласці.

– На Магілёўшчыне высокая яўка выбаршчыкаў, – расказаў старшыня аблвыбаркама Валерый БЕРАСТАЎ, – была абумоўлена альтэрнатыўнасцю на выбарах дэпутатаў Палаты прадстаўнікоў Нацыянальнага сходу Рэспублікі Беларусь сёмага склікання. У рэгіёне на адзін дэпутацкі мандат прэтэндавалі крыху менш за 5 чалавек.

Выбаршчыкі Магілёўскай вобласці традыцыйна праяўляюць высокую актыўнасць на выбарах. Свой голас за таго ці іншага кандыдата ў дэпутаты аддалі 663 625 грамадзян з 804 212 уключаных у спісы для галасавання. Такім чынам, яўка выбаршчыкаў на выбары дэпутатаў Палаты прадстаўнікоў склала 82,52%.

У цэлым парламенцкія выбары ў вобласці праходзілі планамерна, па-дзелавому, без залішняга напружання.

За ходам выбарчай кампаніі ў Магілёўскай вобласці сачылі каля 4,5 тысячы назіральнікаў, у тым ліку больш за 50 міжнародных. Прадстаўнікі місій ад СНД і ШАС далі высокую ацэнку арганізацыі і правядзенні выбараў.

Агульная колькасць выбаршчыкаў Шклоўскай выбарчай акругі № 90 склала 60217 чалавек. Атрымалі бюлетэні для галасавання 55003 выбаршчыкі, прынялі ўдзел у галасаванні 54992 (91,32 працэнта). Супраць усіх кандыдатаў у дэпутаты прагаласавалі 3056 чалавек, 407 бюлетэняў прызнаны несапраўднымі.

Прыводзім вынікі галасавання па кандыдатах у дэпутаты беларускага парламента па Шклоўскай выбарчай акрузе № 90:

АЛЯКСАНДРАВА Інга Віктараўна, “за” – 10581 выбаршчык (19,24 %);

ГАНЧУК Андрэй Аляксандравіч, “за” – 37160 выбаршчыкаў (67,57 %);

МЯЦЕЛІЦА Мікалай Міхайлавіч, “за” – 1246 выбаршчыкаў (2,27 %);

ХАМРАТАЎ Аляксандр Генадзевіч, “за” – 1081 выбаршчык (1,97 %);

ШАМБАЛАВА Таццяна Пятроўна, “за” – 1461 выбаршчык (2,66 %).

Учора адбылося пасяджэнне Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў, на якім падведзены вынікі выбараў у Палату прадстаўнікоў Нацыянальнага сходу Рэспублікі Беларусь сёмага склікання.

КАМЕНТАРЫІ

 Уладзімір АНДРЭЙЧАНКА,

старшыня Палаты прадстаўнікоў Нацыянальнага сходу Беларусі шостага склікання:

У парламенце павінны быць прафесіяналы, людзі з добрым жыццёвым вопытам, каб яны не займаліся палітычным крытыканствам, а ўсё ж такі вырашалі канкрэтныя справы, накіраваныя на развіццё нашай краіны.

У цэнтры ўвагі дэпутатаў перш за ўсё павінны быць прыярытэты развіцця краіны. Сярод іх пытанні занятасці, павышэння даходаў насельніцтва, нарошчвання экспарту, прыцягнення інвестыцый. Будуць гэтыя эканамічныя пытанні вырашаны – будзе і палітычная стабільнасць, будзе развівацца краіна.

Выбары – вельмі важнае грамадска-палітычнае мерапрыемства. Лічу, што, удзельнічаючы ў іх, заўсёды трэба кіравацца разважлівасцю. Мы ўсе добра разумеем, што ад таго, хто прыйдзе працаваць у парламент, шмат у чым залежыць мір, стабільнасць у нашым грамадстве, законнасць, правапарадак, устойлівае развіццё краіны.

Аляксандр ЦЫБУЛЬСКІ,

старшыня Цяхцінскага сельвыканкама:

— Традыцыйна актыўны ўдзел у выбарах дэпутата Палаты прадстаўнікоў прынялі і выбаршчыкі, якія галасавалі на Цяхцінскім участку для галасавання № 15. Участковая выбарчая камісія арганізавала маршрут аўтобуса ПМК № 241, які па графіку, што папярэдне быў разасланы выбаршчыкам усіх населеных пунктаў участка разам з запрашэннямі прыняць удзел у галасаванні, падвозіў іх у аграгарадок і адвозіў да хаты. Дзейнічала і мабільная група, якая забяспечвала выкананне грамадзянскага доўгу тымі, хто выказаў жаданне прагаласаваць дома.

Працэс галасавання праходзіў спакойна, у камфортнай і добразычлівай абстаноўцы. Аматары мастацкай самадзейнасці мясцовага Дома культуры падрыхтавалі цікавую канцэрную праграму.

Міхась КАРПЕЧАНКА.

Print Friendly, PDF & Email