Федэрацыя прафсаюзаў Беларусі падвяла вынікі дабрачыннага праекта “Мары збываюцца”.

Амаль 50 пісьмаў і відэазваротаў ад дзяцей з розных куткоў вобласці атрымала Магілёўская абласная арганізацыя прафсаюзаў. Усяго на адрас ФПБ прыйшло  больш за 400 пасланняў.

Дзіцячыя мары ўжо пачалі збывацца. Прафсаюзы паабяцалі выканаць жаданні семярых пераможцаў, па адным з кожнай вобласці, і з горада Мінска. Усе дзеці-ўдзельнікі праекта атрымаюць сувеніры ад ФПБ.

У Магілёўскай вобласці ўжо ўвасобілася ў жыццё першая мара. Члены прафсаюзнай пярвічкі раённага ЦКРНіР на чале са старшынёй яе Ірынай САВЯНКОВАЙ папрасілі ў прафсаюзнага Дзеда Мароза штучную навагоднюю ёлку. Яны склалі верш пра тое, як шкада высякаць жывое дрэўца. Іх пісьмо і верш закранулі сэрцы арганізатараў дабрачыннага праекта.

Мара педагогаў і выхаванцаў ЦКРНіР збылася якраз дарэчы. Да іх са сталіцы нашай краіны прыехала штучная навагодняя прыгажуня. Падарунак  ва ўрачыстай абстаноўцы перадалі старшыня абласной арганізацыі прафсаюзаў Дзмітрый ЯНКОЎ і старшыня райаб’яднання прафсаюзаў, якія ўваходзяць у ФПБ, Святлана ПАТАПЧЫК. Акрамя таго прадстаўнікі прафсаюзаў уручылі педагогам карэкцыйнага цэнтра электрычную гірлянду і ёлачныя цацкі.

– Раённае аб’яднанне прафсаюзаў аказвае дапамогу выхаванцам цэнтра карэкцыйнага развіцця, навучання і рэабілітацыі ўжо пяты год запар, – распавяла Святлана Уладзіміраўна. – Тут выхоўваюцца дзеткі з асаблівасцямі. Вядома, ім патрабуецца нашмат больш увагі і клопату, але калі пазіраеш на іх, бачыш, якія яны сонечныя і пазітыўныя, зараджаешся іх настроем, і жыццё становіцца ярчэйшым.

Дзеці і педагогі карэкцыйнага цэнтра шчыра падзякавалі за падарунак і адразу ж пачалі ўпрыгожваць прыгажуню-ёлку цацкамі і гірляндамі. А далей, як у казцы, паглядзець на сімвал Новага года завіталі Дзед Мароз і Снягурка. Яны запалілі на ёлцы агеньчыкі і ўручылі дзецям салодкія падарункі, а выхаванцы цэнтра прачыталі казачным персанажам вершы.

                           Святлана МАГІЛЕЎЧЫК.

            Фота аўтара.