Са жніўня мінулага года ў калектыву ААТ “Бялыніцкае райаграпрамтэхзабеспячэнне” прыбаўленне

Са жніўня мінулага года ў калектыву ААТ “Бялыніцкае райаграпрамтэхзабеспячэнне” прыбаўленне – на першае месца працы сюды прыбылі 8 маладых спецыялістаў. У іх ліку і галоўны эканаміст сельгаспрадпрыемства Аляксандр ШАЙПАК.

Родам Аляксандр з г.п. Астрына Гродзенскай вобласці. У дзяцінстве бачыў сябе ў розных прафесіях, але перамагла любоў да лічбаў.

Паступаць вырашыў у Беларускую сельскагаспадарчую акадэмію ў Горках, дзе атрымаў спецыяльнасць эканаміста.

– Першыя ўражанні ад Бялынічаў былі неадназначныя, – распавёў малады спецыяліст.

Вольны час малады спецыяліст бавіць за заняткамі спортам, удзельнічае ў спаборніцтвах або сустракаецца з сябрамі.

На працоўным месцы Аляксандр адчувае сябе цалкам упэўнена і камфортна, а пра свае будні распавядае з веданнем справы.

– Пакуль што ёсць цяжкасці. Як жа без іх? Але, лічу, самае важнае, асабліва калі робіш першыя крокі ў прафесіі, што ёсць да каго звярнуцца па дапамогу і мудрую параду, – дзеліцца ўражаннямі суразмоўца.

Гаспадарка забяспечыла новага супрацоўніка жыллём: у інтэрнаце выдзелілі пакой, ёсць усе камунальныя выгоды. Але на пытанне: ці не хоча ён застацца пасля адпрацоўкі, адказвае, што марыць вярнуцца дадому, дзе яго чакаюць родныя.

Аляксандр настойлівы і працавіты. Менавіта гэтыя важныя якасці ў любой прафесіі не толькі цэняцца, але і дапамагаюць дабівацца высокіх вынікаў і кар’ернага росту. Ён лічыць, што ў яго ўсё яшчэ наперадзе. А калі чалавек на сваім месцы, то, несумненна, праца будзе прыносіць плён і задавальненне.

                               Аліна ЦЫГАНІЙ.

                        Фота аўтара.

Print Friendly, PDF & Email