Дапамога ў новым фармаце
Напружаная эпідабстаноўка ўнесла карэктывы ў дзейнасць паліклінік і сельскіх амбулаторый. Як перабудавалася на новы фармат працы Галоўчынская амбулаторыя ўрача агульнай практыкі, даведалася карэспандэнт “Зары над Друццю”.
Мэта прымаемых мер засцярогі адна – максімальна зменшыць вірусную пагрозу. І самае важнае, адзначаюць медыкі, людзі разумеюць: гаворка ідзе пра іх уласную бяспеку і тых, хто побач.
У Галоўчынскай амбулаторыі задзейнічаюць усе спосабы індывідуальнага падыходу да пацыентаў. З васьмі раніцы да гадзіны дня ўрач агульнай практыкі Святлана СІДАРЭНКА вядзе прыём у кабінеце, а затым каманда медыкаў выязджае ў аддаленыя вёскі.
Людзі, у якіх з’явіліся прыкметы вострай рэспіраторнай інфекцыі, выклікаюць доктара на дом.
– Калі нам тэлефануюць пацыенты, якія маюць павышаную тэмпературу, спрабуюць запісацца на прыём, мы пераарыентоўваем іх чакаць урача дома, – тлумачыць Святлана Сідарэнка. – Зараз адзначаецца ўздым прастудных захворванняў: ВРВІ, бранхіты… Амаль усе захварэлыя праходзяць курс лячэння дома. Таксама прымаем неабходныя прафілактычныя меры. Усіх, хто знаходзіцца ў групе рызыкі, а гэта пажылыя людзі і інваліды, просім не наведваць людныя месцы, у тым ліку і амбулаторыю. Да іх прыязджаем самі. У нас на абслугоўванні знаходзяцца жыхары 16 вёсак, да самай далёкай больш за 15 кіламетраў. Таму нашы рэгулярныя выезды ў аддаленыя населеныя пункты – выдатная магчымасць для пажылых людзей атрымаць меддапамогу своечасова і без лішніх клопатаў. Выкананне элементарных мер бяспекі дапаможа абараніць пажылога чалавека, у якога і так аслаблены імунітэт.
На вуліцах аграгарадка ўсё часцей можна сустрэць вяскоўцаў у ахоўных масках. У сельсавеце, магазінах і іншых грамадскіх месцах ёсць антысептыкі для апрацоўкі рук і паверхняў.
Галоўная рэкамендацыя медыкаў – берагчы сябе. Загадзя паклапаціцеся, каб у хатняй аптэчцы былі супрацьвірусныя прэпараты, бо яны эфектыўныя толькі ў бліжэйшыя гадзіны пасля ўзнікнення першых сімптомаў захворвання. Калі хто-небудзь з вашых родных прастудзіўся, такія прэпараты трэба ўжываць усім членам сям’і, а хвораму пастарацца па магчымасці вылучыць асобны пакой. Для медыкаў вельмі важна, што людзі разумеюць: яны самі адказваюць за сваю бяспеку і за тых, хто знаходзіцца побач з імі.
У мэтах забеспячэння работнікаў арганізацый раёна сродкамі індывідуальнай абароны вытворчасць медыцынскіх масак сталі ажыццяўляць у швейным цэху райста і ААТ “Бытпаслугі г. Бялынічы”. Пашыў масак праводзіцца па папярэдніх замовах.
Аліна ЦЫГАНІЙ.
Фота аўтара.