У райЦГЭ за апошнія 5 гадоў пасля сканчэння абавязковага тэрміну адпрацоўкі засталіся далей працаваць чатыры маладыя спецыялісты

Многія маладыя спецыялісты пасля адбыцця абавязковай адпрацоўкі змяняюць месца працы.

Абумоўлена гэта можа быць рознымі фактарамі, напрыклад, немагчымасцю пабудаваць уласную кватэру, прадузятым стаўленнем з боку калег ці кіраўніцтва… Бывае і так, што пасля абавязковай адпрацоўкі, маладыя людзі пачынаюць шукаць сябе ў іншых сферах дзейнасці. Але ёсць на Бялыніччыне арганізацыі, дзе замацаванню моладзі на рабочых месцах надаюць вялікую ўвагу.

У райЦГЭ за апошнія 5 гадоў пасля сканчэння абавязковага тэрміну адпрацоўкі засталіся далей працаваць чатыры маладыя спецыялісты.

Урач-гігіеніст Юлія ЛАЗОЎСКАЯ прыйшла на працу ў 2015 годзе ўрачом-інтэрнам. Бялынічы – яе малая радзіма, да таго ж, па-шчасціла і з размеркаваннем: пасля заканчэння  БДМУ яе накіравалі на адпрацоўку ў родны горад.

– Сям’я і добрая праца, – вось па якіх крытэрыях тут затрымалася, – усміхаецца Юлія Сяргееўна. Яна дадае, што жыць і працаваць у родным горадзе камфортна, спакойна.

Адпрацоўваць тэрмін абавязковага размеркавання на малую разіму вярнуўся і фельчар-лабарант Ігар МАРДАЧОЎ. У райЦГЭ ён працуе 5 гадоў, таму ведае асноўныя тонкасці сваёй прафесіі і ўжо дзеліцца вопытам з маладзейшымі калегамі. Ён жа вядзе інтэрнэт-сайт арганізацыі.

– Пераддыпломную практыку праходзіў на базе абласнога Цэнтра гігіены і эпідэміялогіі, – распавядае Ігар. – Таму на сваё першае рабочае месца прыйшоў добра падрыхтаваны. Гады адпрацоўкі праляцелі вельмі хутка і змяняць сферу дзейнасці нават думкі не было. У нас зладжаны, згуртаваны працоўны калектыў, цёплыя адносіны з боку кіраўніцтва, дастойная зарплата… Словам, усё тое, што неабходна для нармальнага жыцця.

Такой жа думкі прытрымліваюцца фельчары-лабаранты Валянціна ЖУЛЕГА і Уладзіслава ЦЫРКУНОВА. Пасля заканчэння Магілёўскага медкаледжа яны пачалі сваю працоўную дзейнасць у райЦГЭ. Валянціна, праўда, паспела некалькі месяцаў парабіць у Круглым, адкуль сама родам, але там лабараторыю аптымізавалі, і дзяўчына перавялася ў Бялынічы.

Уладзіславе на працу даводзіцца дабірацца з аграгарадка Вішоў. Аднак, адлегласць яна не лічыць перашкодай, у вялікім горадзе людзі трацяць на праезд куды больш часу і сродкаў.

КАМЕНТАРЫЙ

Ларыса ВАРАВА, інструктар-валеолаг райЦГЭ:

– У нашым калектыве сфарміравалася цёплае і прыязнае стаўленне да маладых спецыялістаў. Дапамагаем новапрыбылым хутчэй адаптавацца на працы, літаральна з першых дзён уключаем іх у грамадскае жыццё. Дый потым падтрымліваем добрым словам ці парадай.

Наша моладзь актыўна ўдзельнічае ў рэлізацыі мерапрыемстваў райЦГЭ па здаровым ладзе жыцця, выконвае значную частку прафілактычна-растлумачальнай работы сярод насельніцтва, адказна адносіцца да выканання працоўных абавязкаў. Несумненна, прыемна, калі яны пасля сканчэння тэрміну абавязковай адпрацоўкі вырашылі тут застацца.  

                                                                                                Святлана МАГІЛЕЎЧЫК.

         Фота аўтара.

Print Friendly, PDF & Email