Самая лепшая справа – уласная
Магазін «Старт», што знаходзіцца ў райцэнтры па вуліцы Якубоўскага, не ведае хіба што лянівы. Яно і праўда: навошта гультаю такія тавары, якімі карыстаюцца сапраўдныя мужчыны-гаспадары?
Гандлёвы аб’ект «Старт» – уласная справа бацькі і сына Мікалая і Рамана МІХАДЗЁНКАЎ. Шмат гадоў таму яны вырашылі адкрыць бізнес па продажы дробнай сельгастэхнікі, інструментаўі запчастак да іх. Потым з’явіліся тавары для рыбалкі і актыўнага адпачынку, веласіпеды, сельскагаспадарчыя прылады і многае іншае. Увогуле, тое, з чаго складаецца асартымент магазіна, было прадыктавана самім жыццём.
– Мы з бацькам любім тэхніку і нядрэнна ў ёй разбіраемся, – гаворыць Раман Міхадзёнак. – Таму многія тэхнічныя навінкі прайшлі апрабацыю ў нашай падсобнай гаспадарцы. Мы абрабляем зямлю, садзім вялікі агарод. Такім чынам, прадаючы штосьці пакупнікам, магу даць ім параду з уласнага вопыту. Што тычыцца разнастайнасці рыбалоўных тавараў і прылад, то рыбалка – самае галоўнае хобі ў нашай сям’і. Як толькі выдаецца вольны час, праводзім яго на рэчцы ці на возеры. Нават мае дачушкі цікавяцца рыбнай лоўляй. Але больш любяць здымаць сам працэс на відэа.
У інтэрнэце Раман вядзе на YouTube уласны канал FishingDrive, дзе выкладвае відэаролікі з рыбнымі трафеямі і цікавымі момантамі вядзення сельскагаспадарчых сезонных работ. Канал мае амаль тры тысячы падпісчыкаў, а некаторыя відэа набралі больш за 10 тысяч праглядаў.
Трэба адзначыць, што асартымент тавараў у магазіне «Старт» пастаянна пашыраецца і абнаўляецца. Некалькі гадоў таму Мікалай Міхадзёнак стаў афіцыйным дылерам кампаніі па вытворчасці прафесійных электра- і бензаінструментаў для будоўлі, сельскай і лясной гаспадаркі – STIHL. А нядаўна ў жыхароў Бялыніччыны з’явілася магчымасць рамантаваць і абслугоўваць інструменты фірмы STIHL на базе магазіна «Старт», а таксама ўдзельнічаць у акцыях сусветнавядомай нямецкай кампаніі. Адна з іх – бясплатнае абслугоўванне фірменных інструментаў на працягу красавіка, падрыхтоўка іх да сезонных работ.
– Таксама мы працуем з вядомымі кампаніямі Bosch і Makita, бо гэтыя вытворцы інструментаў робяць якасны і даступны па кошце тавар, – дадае Раман Міхадзёнак. – У гэтым годзе павялічылі асартымент дробнай сельгастэхнікі: газонакасілак, матаблокаў, мотакультыватараў, бензатрымераў і да т.п. пераважна беларускай і расійскай вытворчасці. Зноў жа, не забываем пра запчасткі і расходныя матэрыялы для сельгас- і мотатэхнікі, інструментаў. Самае прыемнае, што нярэдка даводзіцца чуць ад пакупнікоў: «Гэты тавар мы знайшлі толькі ў вас!». Такі высокі ўзровень ацэнкі надае сіл і жадання працаваць далей. Думаю, і зараз наведвальнікі нашага магазіна не застануцца без прыемных пакупак.
Святлана МАГІЛЕЎЧЫК.
Фота аўтара.
