У Вішоўскім СЦКіВЧ у рамках рэалізацыі абласнога творчага праекта «#Мая_Зямля_Прыдняпроўе» адбыўся шэраг тэматычных мерапрыемстваў для дашкольнікаў і вучняў Вішоўскай СШ.
Захаванне нашай гісторыка-культурнай спадчыны, веданне мінулага, прывіццё любові да сваіх каранёў, сваёй Бацькаўшчыны – адны з галоўных задач, якія дапамагаюць падрастаючаму пакаленню сфарміравацца як гарманічным і цэласным асобам, любіць сваіх родных, сяброў, сваю малую радзіму і краіну.
З гэтай мэтай працаўнікі Вішоўскага СЦКіВЧ правялі для дзяцей сярэдняга школьнага ўзросту квэст па гадавым цыкле народных свят ад Каляд да Пакроваў. Дзеці гулялі ў тэматычныя гульні, характэрныя для таго ці іншага свята, частаваліся абрадавымі стравамі. З асаблівай цікавасцю яны знаёміліся з прадметамі народнага побыту і нават самі спрабавалі змалоць муку ў жорнах.
Самыя маленькія жыхары Вішоўскага краю – дашкольнікі – змаглі паўдзельнічаць у цікавай сустрэчы з майстрам па пляценні з папяровай лазы Людмілай КАРАЛЁВАЙ. Людміла Рыгораўна распавяла маленькім хлопчыкам і дзяўчынкам аб пляценні з лазы, у тым ліку і з паперы, а таксама разгарнула ў дзіцячым садзіку невялікую выставу сваіх работ.
А вось вучні пачатковых класаў не толькі пазнаёміліся з вырабамі майстрыхі, а яшчэ і паспрабавалі самі сплесці з папяровай лазы невялікія падзелкі – сонейкі, сімвалы надыходзячай вясны.
Святлана МАГІЛЕЎЧЫК.
Фота аўтара і з архіва Вішоўскага СЦКіВЧ.
