Новыя віды спагнанняў

Ранейшы КаАП прадугледжваў 10 відаў адміністрацыйных спагнанняў. У абноўленым кодэксе прадугледжана 8.

Папярэджанне больш не з’яўляецца адміністрацыйным спагнаннем. А агульнай умовай вызвалення ад адміністрацыйнай адказнасці з’яўляецца аб’яўленне пісьмовага папярэджання.

Вызваленне ад адміністрацыйнай адказнасці магчыма толькі ў выпадку здзяйснення такіх катэгорый адміністрацыйных правапарушэнняў, як адміністрацыйныя правіннасці і значныя (тыя, за якія накладаюцца канфіскацыя, дэпартацыя і штраф) адміністрацыйныя правапарушэнні.

ГРАМАДСКІЯ РАБОТЫ — НОВЫ ВІД АДМІНІСТРАЦЫЙНАГА СПАГНАННЯ

Такі від адміністрацыйнага спагнання, як папраўчыя работы, заменены грамадскімі работамі. Першыя адпрацоўваліся па месцы працы фізасобы і ўстанаўліваліся на тэрмін ад 1 да 2 месяцаў. Другія прадугледжваюць выкананне грамадзянінам бясплатных работ у вольны ад асноўнай працы, службы або вучобы час. Грамадскія работы ўстанаўліваюцца на тэрмін ад 8 да 60 гадзін і выконваюцца не больш за 4 гадзіны ў дзень.

Пры гэтым, на такія работы могуць адправіць парушальніка толькі з яго згоды. Нельга накіроўваць на іх пенсіянераў, непаўналетніх, цяжарных, жанчын у дэкрэце, людзей з інваліднасцю I і II групы, замежнікаў, сілавікоў.

У сваю чаргу, ухіленне ад грамадскіх работ з’яўляецца адміністрацыйным правапарушэннем, якое караецца штрафам ад 2 да 20 бв або адміністрацыйным арыштам.

ЗМЕНЫ Ў САСТАВАХ ПРАВАПАРУШЭННЯЎ І САНКЦЫЯХ

У новым КаАП асучаснены падыходы да многіх адміністрацыйных правапарушэнняў, у тым ліку выключаны неактуальныя саставы.

У дачыненні да некаторых саставаў правы агульнай уласнасці, якія тычацца грамадскага парадку альбо здзяйсняюцца суб’ектамі гаспадарання (напрыклад, у сферы падаткаабкладання, абароту і рынку каштоўных папер, мытных правапарушэнняў), падыходы заканадаўцы не толькі засталіся ранейшымі, але нават сталі значна больш жорсткімі.

Дзмітрый ПАЎЛОВІЧ,

начальнік РАУС.


Print Friendly, PDF & Email