Праца на агульны вынік

У мінулую пятніцу ў ААТ «Бялынічы» пачалася нарыхтоўка зялёных кармоў.

Сёлетняя касавіца тут не зусім звычайная. На базе сельгаставарыства быў створаны механізаваны
атрад, у які ўвайшлі працаўнікі ААТ «Бялынічы», «Аграсэрвіс» і «Бялыніцкае райаграпрамтэхзабеспячэнне». Механіза
тары па чарзе будуць убіраць шматгадовыя травы ў кожнай з гаспадарак. На палі ААТ «Бялынічы», напрыклад, было адведзена 4 дні. Наступны пункт працы – ААТ «Аграсэрвіс». Тут нарыхтоўчыя мерапрыемствы пачаліся пазаўчора.

Першую зялёную масу ўдзельнікі механізаванага атрада заклалі на сянаж у траншэі каля аграгарадка Галоўчын. Штодзень рупліўцы затрамбоўваюць каля 800 т сенажу. Працаўнікі, занятыя на нарыхтоўцы кармоў, забяспечваюцца трохразовым гарачым харчаваннем.

– Стварэнне механізаванага атрада дазволіць якасна і ў хуткія тэрміны правесці касавіцу ў гаспадарках раёна, – адзначыў першы намеснік старшыні райвыканкама-намеснік райсельгасхарчу Віталь ЗАКАРДОНСКІ. – Адна з праблем – невялікая колькасць корманарыхтоўчай тэхнікі – вырашылася за кошт аб’яднання рэсурсаў трох гаспадарак. Зялёныя кармы павінны нарыхтоўвацца хутка і з выкананнем усіх тэхналагічных патрабаванняў, інакш згубіцца іх спажыўная якасць. Высакаякасныя кармы ў сваю чаргу – сытная зімоўка буйной рагатай жывёлы.

Усяго ў раёне плануецца нарыхтаваць больш за 119, 5 тысяч тон кармавых адзінак, у сярэднім 38,7 ц кармавых адзінак на адну ўмоўную галаву БРЖ. У планах нарыхтаваць 7200 т сена, 119312 т сенажу і 11358 т сіласу, а таксама салому і зернефураж.

– Сёлета на палях раёна вырас нядрэнны травастой, убраць яго на сянаж і сена плануем не больш чым за месяц, – дадае Віталь Рыгоравіч. – Нарыхтоўваць кармы будзем і ў поліэфірную плёнку, гэты спосаб паказаў сваю эфектыўнасць, і далей мы будзем укараняць яго ў корманарыхтоўчай практыцы. На дапамогу аграрыям прыйшлі кіраўнікі ДЛГУ «Бялыніцкі лясгас» Аляксандр ХОДАС і ПМК-82 Аляксей БАРАНАЎ, якія выдзелілі, адпаведна, 2 і 3 адзінкі тэхнікі для адвозкі зялёнай масы. І самі механізатары гаспадарак зацікаўлены ў супольнай працы. Першае і, напэўна, самае важнае – заробак, які будзе дастойнай узнагародай за іх адказную працу.

Святлана МАГІЛЕЎЧЫК.

Фота прадастаўлена ААТ «Бялынічы». 

 

Print Friendly, PDF & Email