Сям’я і вёска
Напрыканцы мінулага тыдня на гарадскім стадыёне прайшлі спаборніцтвы сярод маладых сем’яў, якія пражываюць у сельскай мясцовасці.
У раённым этапе рэспубліканскага сямейнага сельскагаспадарчага праекта «Уладар сяла» прынялі ўдзел тры шлюбныя пары разам са сваімі дзеткамі. Гэта Вольга і Сяргей ВАСКОЎСКІЯ з аграгарадка Вялікая Машчаніца, Алена і Андрэй ФЕДАСЕЕВЫ з вёскі Малы Кудзін, а таксама Вольга і Раман ЯЎСЕЕВЫ з Лебядзянкі.
Арганізатарам конкурсу выступіў раённы камітэт ГА «БРСМ» пры падтрымцы аддзела ідэалагічнай работы, культуры і па справах моладзі райвыканкама. Спаборніцтвы прайшлі ў некалькіх намінацыях: «Візітка», «Па дровы», «Вясковая спартыўная эстафета», «Сюрпрыз», а таксама ўдзельнікі дэманстравалі асаблівасці і традыцыі свайго сямейнага быту і лепшыя гаспадарскія здольнасці.
На падворках сем’яў-удзельніц чаго толькі не было: традыцыйныя беларускія стравы, дамашняя выпечка і кансерваваныя загатоўкі на зіму па асабістых рэцэптах, маляўнічыя кошыкі і сурвэткі, зробленыя гаспадарамі і іх дзецьмі, і шмат чаго іншага.
Гледачам прыйшліся да спадобы конкурсы па распілоўцы бервяна, эстафета на хуткасць і якасць пераносу вады, перавозка гаспадыні на тачцы, якія трэба было выконваць у пары, чым і правяралася зладжанасць сем’яў. Захапляльным момантам стала спавіванне лялькі, якое выконвала толькі мужская палова.
Кампетэнтнае журы ў складзе начальніка аддзела ідэалагічнай работы, культуры і па справах моладзі райвыканкама Іны ІГНАТОВІЧ, першага сакратара РК ГА «БРСМ» Марыны ШАБУСАВАЙ, старшыні райкама прафсаюза работнікаў АПК Алены СНЫТКО і старшыні РА «БТЧК» Марты ШАРАПАВАЙ ацэньвала якасць, крэатыўны падыход і хуткасць выканання заданняў.
Па выніках усіх конкурсаў месцы размеркаваліся наступным чынам: трэцяе заняла сям’я Федасеевых, якая, акрамя асноўнай узнагароды, яшчэ атрымала спецыяльны прыз ад ААТ «Бялынічы». На другім месцы размясцілася сямейная пара Вольгі і Рамана Яўсеевых, якім таксама быў уручаны і спецыяльны падарунак ад РА «БТЧК». А пераможцай прызнана сям’я Васкоўскіх. Намеснік дырэктара па ідэалагічнай рабоце ААТ «Новая Друць» Кацярына ЖУК і намеснік старшыні раённай арганізацыі ГА “Белая Русь” Жанна ЗВЯГІНА ўручылі ім памятныя прызы.
Усе ўдзельнікі раённага этапа «Уладар сяла» атрымалі каштоўныя падарункі ад аддзела ідэалагічнай работы, культуры і па справах моладзі райвыканкама, райкама ГА «БРСМ» і РА прафсаюза работнікаў АПК.
Наталля БАРОДЗЬКА.
Фота аўтара.