Дэпутат, які спявае

Дэпутат раённага Савета дэпутатаў 28 склікання па Лямніцкай выбарчай акрузе №20 Алена ХАРТАВА ўжо не навічок у дэпутацкай дзейнасці.

Дырэктар Вішоўскага СЦКіВЧ Алена Міхайлаўна адзначае, што ўсе пытанні, якія да гэтага часу да яе паступалі, не засталіся без увагі.

– Людзі звярталіся да мяне з рознымі просьбамі: дапамагчы скарэктаваць маршрут руху аўтобусаў з райцэнтра ў Лямніцу, узнікалі таксама пытанні па працы пошты, медыцынскага абслугоўвання, зносе аварыйнага безгаспадарчага дома і інш., – гаворыць Алена Хартава. – Многія пытанні былі накіраваны для разгляду ў адпаведныя службы і ў Вішоўскі сельсавет у тым ліку. Большая частка праблем была вырашана ў даволі сціслыя тэрміны. Увогуле для мяне прыкладам дэпутацкай дзейнасці з’яўляецца старшыня СВК «Калгас «Радзіма» Аляксандр ЛАПАЦЕНТАЎ. Напрыклад, сёлета, напярэдадні свята ў гонар апосталаў Пятра і Паўла, разам з ім рабілі аб’езд населеных пунктаў Вішоўскага сельсавета, віншавалі ветэранаў працы. Перад канцэртамі Аляксандр Міхайлавіч шмат гутарыў з вяскоўцамі, цікавіўся іх клопатамі, чым жывуць, што хвалюе. Шляхі вырашэння праблем знаходзіліся даволі аператыўна, хоць штосьці і не заўсёды было ў прамой кампетэнцыі сельгаскааператыва. Мае магчымасці як дэпутата куды больш сціплыя, але застацца раўнадушнай да праблемы чалавека я не магу.

– У цёплую пару года неад’емнай часткай нашай працы становяцца выязныя канцэрты ў аддаленыя вёскі не толькі нашага сельсавета, але і ўсяго раёна, – працягвае дэпутат. – І мой выбарчы ўчастак не застаецца без увагі. У мінулым годзе ўдзельнікі нашай мастацкай самадзейнасці далі там 7 канцэртаў.

Алена Хартава – чалавек з актыўнай грамадзянскай пазіцыяй. З самага дзяцінства ярка праяўляліся яе не толькі лідарскія, але і артыстычныя якасці. І хоць у жыцці яна выбрала эканамічную адукацыю, сфера культуры, у тым ліку і грамадская дзейнасць не прамінулі застацца лідзіруючымі ў яе біяграфіі. У свой час Алена працавала другім сакратаром і кіраўніком РК ГА «БРСМ», а цяпер дык і ўвогуле яе прозвішча добра вядома не толькі на тэрыторыі Вішоўскага сельсавета. Гэтаму спрыяе і актыўнае творчае жыццё. Што казаць, нават сваю сям’ю Алена Міхайлаўна далучае да музыкі і песні. Яе дачушкі Вольга і Каця ў прамым сэнсе выраслі пры сельскай установе культуры. Сёлета дзяўчаты скончылі школу, і цяпер знаходзяцца ў стадыі абітурыентаў. Канешне ж, маці больш за ўсіх перажывае за іх, хвалюецца, але верыць, што з песняй яны не расстануцца.

– У нас летам вельмі насычаны працоўны графік, – гаворыць Алена Міхайлаўна. – Выязныя канцэрты, святы, тэматычныя мерапрыемствы… Плюс цеснае супрацоўніцтва з СВК «Калгас «Радзіма». Амаль ніводная іх знакавая падзея не абыходзіцца без удзелу прадстаўнікоў нашай установы культуры. Хоць працаўнікі сельгаспрадпрыемства і жыхары аграгарадка Вішоў бачылі выступленні зорак айчыннай эстрады першай велічыні, усё роўна ім падабаюцца канцэртныя нумары «сваіх» артыстаў. Стварыць свята, падарыць пазітыўны настрой аднавяскоўцам вельмі важна для мяне і як для прадстаўніка сферы культуры, і як для дэпутата, і проста – чалавека.

Дзмітрый КАРПІКАЎ, старшыня Вішоўскага сельсавета:

– У аграгарадку наладжана цесная ўзаемасувязь устаноў і арганізацый розных узроўняў і сфер дзейнасці. У гэтым я асабіста ўпэўніўся, калі стаў тут працаваць. Безумоўна, яна прыносіць станоўчыя вынікі. Асабліва ў зносінах з людзьмі, бо калі для аднаго чалавека жыццёвае пытанне можа быць вельмі простым, то для іншага – жыццёваважным.

У Алены Хартавай выдатна атрымліваецца ісці на кантакт з людзьмі, дзякуючы ёй быў вырашаны шэраг унутраных пытанняў жыхароў яе выбарчага ўчастка. Але ж дзейнасць аднаго чалавека ў агульнай справе адразу не выдзеліш. Дый не трэба. Тых цёплых і святочных момантаў, якія Алена Міхайлаўна падарыла сваім землякам падчас канцэртаў, цалкам дастаткова, каб станоўча ацаніць яе грамадскую дзейнасць.

Святлана МАГІЛЕЎЧЫК.
Фота аўтара.

Print Friendly, PDF & Email

Добавить комментарий

Ваш адрес email не будет опубликован.