Наша краіна знаходзіцца на водападзеле басейнаў Балтыйскага і Чорнага мораў. І хоць прамога выхаду да іх няма, маладзёжны пасол Мэт устойлівага развіцця, бялынічанка Кацярына ЧОРНАЯ ўпэўнена: праблема забруджвання і закіслення марскога асяроддзя для нас таксама актуальная.

Пасля заканчэння СШ №2 дзяўчына вучылася ў Магілёўскім гандлёвым каледжы, ацяперяна –студэнтка Беларускай дзяржаўнай сельскагаспадарчай акадэміі ў Горках. Вучыцца па спецыяльнасці «Эканоміка і арганізацыя вытворчасці ў галінах аграпрамысловага комплексу».

Мэты ўстойлівага развіцця– гэта набор з 17 узаема звязаных мэт, распрацаваных у 2015 годзе Генеральнай асамблеяй ААН у якасці «плану дасягнення лепшай і больш устойлівай будучыні для ўсіх». Гэтыя мэты былі названыя ў рэзалюцыі Генасамблеі ААН «Парадкам дня на перыяд да 2030 года» і яны замянілі сабой Мэты развіцця тысячагоддзя. Выніковы дакумент Генасамблеі ААН «Пераўтварэнне нашага свету: Парадак дня ў галіне ўстойлівага развіцця на перыяд да 2030 года» змяшчае 17 глабальных мэт і 169 адпаведных задач.

Сюды ўваходзяць такія мэты як ліквідацыя беднасці і голаду, гендэрная роўнасць, якасная адукацыя, захаванне марскіх экасістэм і іншыя.

– Вучоба дае мне масу магчымасцей для самарэалізацыі: удзельнічаю ў конкурсах, пішу навуковыя артыкулы на эканамічную тэматыку, з’яўляюся валанцёрам розных праектаў, – распавядае Кацярына. – Паўдзельнічаць у конкурсе «Маладзёжныя паслы Мэт устойлівага развіцця–будучыня планеты ў нашых руках» вырашыла пасля таго, як убачыла адпаведны пост у Instagram.

Маладзёжныя паслы папулярызуюць Мэты ўстойлівага развіцця сярод сваіх равеснікаў, інфармуюць пра механізмы дасягнення паказчыкаў ўстойлівага развіцця на лакальным і нацыянальным узроўнях, дапамагаюць набываць маладым людзям веды і прафесійныя кампетэнцыі XXI стагоддзя, асвойваць ідэі і прынцыпы ўстойлівага развіцця.

Каб стаць маладзёжным паслом, Кацярыне Чорнай трэба было прадставіць свой унікальны праект камісіі,у якую ўваходзілі прадстаўнікі ААН, Міністэрства адукацыі і іншыя. Праект дзяўчыны апынуўся ў ліку лепшых. Ёй дасталася Мэта № 14 – «Захаванне марскіх экасістэм».

– Галоўная мая мэта, – адзначае дзяўчына, –у тым, каб як мага больш школьнікаў і студэнтаў даведаліся аб праблеме забруджвання марскіх экасістэм. Бо сусветны акіян уплывае на ўмовы надвор’я на планеце, таксама ў ім жыве вялікая колькасць жывых арганізмаў, якія ўяўляюць велізарную каштоўнасць для ўсяго чалавецтва.

Для дасягнення сваёй задачы разам з камандай аднадумцаў студэнтка праводзіць тэматычныя круглыя сталы і лекцыі.

– Мне цікавая гідрасфера, яшчэ з дзяцінства любіла пазнаваць новыя факты пра бязмежныя моры і акіяны, –распавядае Кацярына Чорная. –Падчас сустрэч з моладдзю часта паўтараю, што кожны можа зрабіць свой унёсак у захаванне марскіх экасістэм. Самае простае – не выкідваць смецце ў рэкі і азёры, бо менавіта яны напаўняюць вадой моры і акіяны.

Дзмітрый ЦІХАНАЎ.

Фота аўтара.