Яна бачыць свет крышачку інакш

Кожнае дзіця ад нараджэння Бог надзяляе шматлікімі талентамі, толькі так часта здараецца, што не ўсе могуць скарыстацца імі ў поўнай меры. Але на тое і даецца намусім дзяцінства, каб раскрыць і сфарміраваць у сабе гэтыя таленты, каб навучыцца не толькі прозе, але і паэтыцы жыцця.

І мы самі, наколькі помнім сябе ў дзяцінстве, столькі радасці адчувалі, калі адкрывалі штосьці новае ў вялікім свеце.

Гераіня гэтага матэрыялу, юная жыхарка аграгарадка Вішоў Дзіяна ПАПОВА,на першы погляд – самы звычайны падлетак са звычайнымі цікавасцямі і адзнакамі ў школе. Але гэта толькі падаецца, бо насамрэч за знешняй сціпласцю хаваецца вялікае ўнутранае пачуццё, імкненне зрабіць навакольны свет крышачку лепшым і прыгажэйшым.

– Калі я была ў першым класе, вельмі спадабаліся ўрокі малявання, якія праводзіла наша настаўніца Алена ГАЎРЫЛАВА, – распавядае Дзіяна. – А потым мама адвяла мяне ў клас філіяла дзіцячай школы мастацтваў да Алены МАЛХАСЯН. Я была такая шчаслівая, што магу маляваць столькі часу, колькі мне хочацца. Алена Мікалаеўна і Алена Іванаўна пазнаёмілі мяне з чароўным светам мастацтва, за што ім вялікі дзякуй.

У сваіх работах Дзіяна выкарыстоўвае ў асноўным гуаш і алоўкі. А яшчэ вельмі любіць маляваць нацюрморты і кветкі. Хоць і тэматычныя малюнкі таксама атрымліваюцца нядрэнна. У адкрытым дыстанцыйным конкурсе дзіцячай мастацкай творчасці «Маршруты памяці. Дарогамі вайны» ў рамках раённага конкурсу дзіцячых малюнкаў «Дзеці, якія не ведалі вайны, малююць Перамогу», Дзіяна Папова заняла ІІ месца ва ўзроставай катэгорыі 13-16 гадоў.

Але гэта яшчэ не ўсе яе перамогі. Летась малюнкі Дзіяны былі ўдастоены Гран-пры ў міжнародным рознажанравым конкурсе «Letostar-2020», а ў гэтым годзе дзяўчынка стала дыпламанткай ІІ ступені ў міжнародным інтэрнэт-конкурсе мастацтваў «Львяня запрашае сяброў» і лаўрэатам І ступені ў творчым інтэрнэт-праекце «Пакары вяршыню», які праходзіў у горадзе Іўе.

Акрамя малявання ў Дзіяны ёсць шмат іншых захапленняў. Яна, да прыкладу, вырошчвае смаўжоў-ахацін. Да гэтага занятку яе далучыла класны кіраўнік, настаўнік хіміі і біялогіі Алена ВАРАПАЕВА. Разам са сваёй настаўніцай дзяўчынка не толькі вывучыла жыццё і ўмовы незвычайных хатніх пітомцаў, але і апісала свой вопыт у невялікай навуковай рабоце. Гэта работа была высока адзначана на раённым узроўні, а ўзяць на выхаванне афрыканскіх смаўжоў пагадзіліся многія вучні Вішоўскай школы.

– Пагаджуся з выразам, што Дзіяна Папова бачыць свет крышку інакш, – распавядае пра сваю вучаніцу яе настаўніца па маляванні Алена Малхасян. – Яна вельмі сціплая, але ў той жа час мэтанакіраваная, стараецца зрабіць усё правільна, прадумана. Ведаю, што ў будучым яна хоча абраць для сябе медыцынскую спецыяльнасць, але хочацца, каб і на жывы свет мастацтва яна не забывалася. Упэўнена, што ў зусім недалёкай будучыні дзяўчынка зробіць гэты свет дабрэйшым і прыгажэйшым.

Святлана МАГІЛЕЎЧЫК.

Фота аўтара.

 

Print Friendly, PDF & Email

Добавить комментарий

Ваш адрес email не будет опубликован.