Летась супрацоўнікі раённай пракуратуры працягвалі займаць прынцыповую пазіцыю ў адстойванні дзяржаўных, грамадскіх інтарэсаў і правоў асобы і ажыццяўлялі комплекс мер па ўмацаванні парадку і законнасці на тэрыторыі Бялыніцкага раёна. Аб гэтым – наша гутарка з пракурорам раёна Ігарам АЛЁХНАМ.
– Ігар Васілевіч, раскажыце, як у цэлым ацэньваеце крымінагенную абстаноўку і якія віды злачынстваў і правапарушэнняў найбольш характэрныя для нашага раёна?
– Агульная колькасць зарэгістраваных злачынстваў у параўнанні з 2021 годам, на жаль, павялічылася са 174 да 196, або на 12,6%. Адзначана і некаторае зніжэнне ўзроўню іх раскрывальнасці – з 76,4%
да 74,5%, хаця гэты паказчык перавышае сярэднеабласны (67,5%). Узровень злачыннасці на 10 000 насельніцтва таксама павялічыўся і склаў 107,6 злачынстваў супраць 93 за 2021 год пры сярэднеабласным каэфіцыенце 97,4. Колькасць учыненых злачынстваў павялічылася на тэрыторыі Лебядзянкаўскага (з 6 да 14), Ланькаўскага (з 6 да 10) і Галоўчынскага (з 20 да 22) сельсаветаў, а таксама ў Бялынічах (з 78 да 102). Таксама павялічылася колькасць злачынстваў, зарэгістраваных у грамадскіх месцах – з 32 да 35, зробленых групай асоб – з 7 да11, зарэгістравана 9 хуліганстваў,
якія цягнуць крымінальную адказнасць (8), 16 крадзяжоў шляхам выкарыстання камп’ютарнай тэхнікі (15), 4 злачынствы супраць інфармацыйнай бяспекі (2).
– Вострай праблемай для раёна шмат гадоў запар заставалася «п’яная» злачыннасць. Ці ёсць змены ў гэтым кірунку?
– На жаль, негатыўныя тэндэнцыі захоўваліся і летась. Практычна кожнае трэцяе злачынства адбывалася ў стане алкагольнага ап’янення. Усяго зарэгістравана 60 такіх выпадкаў, а ўдзельная іх вага ад агульнай колькасці злачынстваў склала 43,5%. Узровень «п’янай» злачыннасці ў раёне па-ранейшаму з’яўляецца адным з самых высокіх у вобласці і значна перавышае агульнарэспубліканскі (34,9). Найбольш часта ў стане алкагольнага ап’янення ўчыняліся крадзяжы, хуліганствы, злачынствы супраць жыцця і здароўя чалавека, а таксама ў сферы сямейна-бытавых адносін. Апошніх зафіксавана 16, у 2021 годзе – 13.
– Менавіта папярэджанне ўсіх відаў правапарушэнняў з’яўляецца адным з прыярытэтных напрамкаў барацьбы са злачыннасцю. Як спрацавалі ў гэтым кірунку суб’екты прафілактыкі?
– Павінен канстатаваць, што ў шэрагу выпадкаў умовай да ўчынення многіх злачынстваў з’явіліся факты неналежнага ўзаемадзеяння паміж суб’ектамі прафілактыкі, парушэнні і недахопы, у тым ліку сістэмнага характару, у рабоце РАУС, Саветаў грамадскіх пунктаў аховы правапарадку, цэнтральнай раённай бальніцы. Датычацца яны непрыняцця своечасовых і якасных мер па пастаноўцы на ўлік да ўрачанарколага, вырашэння пытання аб абмежаванні грамадзян у дзеяздольнасці па прычыне злоўжывання іх алкаголем, своечасовага выяўлення і спынення адміністрацыйных правапарушэнняў, якія ўчыняюцца грамадзянамі ў стане алкагольнага ап’янення. Дарэчы, летась значна – на 36% – павялічылася колькасць крадзяжоў маёмасці грамадзян і юрыдычных асоб – з 50 да 68, у тым ліку на 26,3%, або з 19 да 24 – крадзяжоў з жылля грамадзян, і такая тэндэнцыя адзначаецца ўжо цягам двух гадоў запар. Скарацілася і іх раскрывальнасць, што таксама сведчыць аб неналежнай рабоце суб’ектаў прафілактыкі і аб адсутнасці рэзультатыўнасці пры рэалізацыі мерапрыемстваў, накіраваных на папярэджанне крадзяжоў. Тое ж датычыцца і злачынстваў у сферы сямейна-бытавых адносін: аналіз
прычын і ўмоў, якія садзейнічаюць іх учыненню, сведчыць аб фактах непрыняцця зацікаўленымі суб’ектамі прафілактыкі своечасовых мер, накіраваных на «фіксацыю» прыкмет трывожнага становішча ў сем’ях, ухіленне прычын і ўмоў супрацьпраўных дзеянняў на ранняй стадыі.
Падрабязны матэрыял чытайце ў нумары 8 раённай газеты ад 28 студзеня 2023 года.
