Вам наша прызнанне і нізкі паклон
Час няўмольна імчыцца наперад. Усё менш у жывых застаецца тых, хто пра жахі вайны памятае не па чутках, – нашых ветэранаў. Менавіта дзякуючы ім мы жывем сёння пад мірным небам… Блакітным небам, за якое больш за сем дзясяткаў гадоў таму яны хвяравалі сваім здароўем і жыццём. Мы ў бясконцым абавязку перад імі, а наша падзяка за іх подзвіг – памяць…
У гонар такой важнай даты ў гісторыі раёна – 75-годдзя вызвалення ад нямецка-фашысцкіх захопнікаў – юбілейныя медалі “75 год вызвалення Беларусі ад нямецка-фашысцкіх захопнікаў” былі ўручаны трыццаці двум ветэранам і інвалідам Вялікай Айчыннай вайны, працаўнікам тылу, блакаднікам Ленінграда, былым вязням фашызму, якія пражываюць на тэрыторыі нашага раёна.
Тым ветэранам, хто па стане здароўя змог прыняць удзел у мітынгу, прымеркаванаму да памятнай даты, юбілейныя медалі былі ўручаны падчас урачыстасці. Да астатніх днямі завіталі на дом ваенны камісар Бялыніцкага і Круглянскага раёнаў Мікалай ГАМОЛКА і начальнік упраўлення па працы, занятасцi i сацыяльнай абароне райвыканкама Вольга ТАРАН. Яны павіншавалі ветэранаў з 75-годдзем вызвалення Беларусі ад нямецка-фашысцкіх захопнікаў, пажадалі ім моцнага здароўя і даўгалецця, а таксама ўручылі юбілейныя медалі.
З пачуццём асаблівай падзякі сустракалі іх пажылыя людзі. Хтосьці – са слязамі на вачах, некаторыя дзяліліся ўспамінамі, паказвалі старыя фотаздымкі і баявыя ўзнагароды, расказвалі вершы і спявалі песні пра вайну.
У кожнага з іх свая гісторыя, але ўсіх іх аб’ядноўвае адно – яны жывыя сведкі страшэнных гадоў мінулай вайны.
Тэкст і фота Марыі БАРАНАВАЙ.