У рамках Адзінага дня бяспекі 9 верасня ў аграгарадку Цяхцін супрацоўнікі розных служб прадставілі комплекс тэматычных мерапрыемстваў для дзяцей і дарослых, якія тычыліся бяспекі іх жыццядзейнасці.

Мерапрыемства прайшло побач з Цяхцінскім ВПК ДС СШ з удзелам супрацоўнікаў РАНС, “ОСВОД”, РА ГА “БТЧК”, мнагапрофільнага цэнтра “Ветразь”, БРСМ і райста.

Пасля паспяховай практычнай адпрацоўкі плана эвакуацыі з навучэнцамі ў двары школы прайшлі прафілактычныя заняткі па папярэджанні надзвычайных сітуацый, а таксама навучанне правільным паводзінам ва ўмовах пажару. Інспектар ГПіУГ РАНС Кацярына ЛЮБІВАЯ раздала ўсім удзельнікам тэматычныя памяткі і буклеты, якія дазволяць замацаваць веды, атрыманыя падчас мерапрыемства.

– Самае дарагое, што ёсць у нас – гэта нашы дзеці, іх бяспека вельмі важная. Таму яны павінны з малых гадоў ведаць правілы бяспекі жыццядзейнасці. І выдатна, што гэта праходзіць у даступнай для іх форме, – распавёў дырэктар школы Аляксандр МАМЧАНКА. – Навучанне дзяцей асновам бяспекі дапаможа ім не разгубіцца ў крытычнай сітуацыі і дапамагчы тым, хто трапіў у бяду. Самае галоўнае, дзеці ставяцца да гэтага вельмі сур’ёзна.

– Свята нам спадабалася. Займальныя заданні і конкурсы, музыка, а галоўнае – шмат карыснага і пазнавальнага. Настаўнікі і работнікі РАНС прыклалі ўсе намаганні, каб мы ведалі, як трэба дзейнічаць у надзвычайных сітуацыях, і былі гатовыя да ўсяго, – падзялілася сваімі ўражаннямі ад мерапрыемства старшакласніца Аляксандра ТАЧЫЛАВА.

Таксама на мерапрыемстве былі прадстаўлены выставы з інфармацыяй аб правілах паводзін на вадзе, пра бяспеку ў інтэрнэце. Тэматычная пляцоўка МЦ “Ветразь” прыцягнула шмат увагі з боку юных наведвальнікаў.

– Мы стварылі гульнёвую зону “Дзеці за бяспечны інтэрнэт”. Тут шмат розных заданняў на веданне сацыяльных сетак і аб тым, як імі правільна карыстацца. Гэта вельмі актуальна на сённяшні дзень, – адзначыла дырэктар установы Іна ВІННІКАВА.

Акцыя заклікае: зрабіце бяспечным не толькі адзін дзень, а ўсё сваё жыццё!

                          Аліна ЦЫГАНІЙ.

            Фота аўтара.