Працаўнікі арганізацый і ўстаноў Прыдруцкага краю,  жыхары раёна прынялі актыўны ўдзел у мерапрыемствах абласнога суботніка па азеляненні і навядзенні парадку на зямлі.

Працоўны дэсант райвыканкама, аддзела ідэалагічнай работы, культуры і па справах моладзі, ФАКу “Друць”, жылкамгаса, рэдакцыі раённай газеты “Зара над Друццю” і іншых арганізацый займаўся работамі па азеляненні тэрыторый каля вуліц Мінская, Задруцкая і Мічурына райцэнтра. Уздоўж новага мікрараёна па вуліцы Мінская, збоку ад дарогі, неўзабаве вырасла цэлая алея маладых бярозак, а на Задруцкай пасяліліся маладзенькія сосны. Пасадачны матэрыял быў прадастаўлены ДЛГУ “Бялыніцкі лясгас”. Дарэчы, самі работнікі лясгаса ў суботу актыўна папрацавалі на ачыстцы лясоў раёна ад захламленасці. Да іх далучыліся калектывы райЦГЭ на чале з галоўным урачом Аленай ДАМАРАЦКАЙ, райінспекцыі ПРіАНА і міжрайаддзела Дзяржкамітэта судовых экспертыз.

Усяго ў акцыі “Чысты лес” прынялі ўдзел больш за 300 працаўнікоў лясгаса і 74 – з іншых арганізацый. Прыбрана з ляснога фонду 6 м3 смецця і 40 м3 хламу, дапоўнены ляснымі культурамі 1,3 га пасадак новага лесу.

– У рамках мерапрыемстваў па азеляненні тэрыторый у нашым раёне высаджана 1455 дрэў, – паінфармавала карэспандэнта раённай газеты начальнік аддзела ЖКГ райвыканкама Галіна ПАНЦЯЛЕЕВА. – У сельскай мясцовасці – 435, горадзе – 385. Яшчэ 570 дрэў пасадзілі вакол аўтадарог працаўнікі ДЭУ-74 і 65 – ДРСУ-170. Дэкаратыўныя дрэвы і кустарнікі па вуліцы Мічурына райцэнтра высадзілі работнікі жылкамгаса.

Таксама Галіна Рыгораўна дадала, што ў суботу калектывы арганізацый і ўстаноў раёна актыўна наводзілі парадак на замацаваных тэрыторыях і ў грамадскіх месцах, аб’ектах сацыяльнай сферы, у месцах масавага адпачынку, вакол помнікаў і пахаванняў часоў Вялікай Айчыннай вайны.

На Магілёўшчыне ў мерапрыемствах абласнога суботніка па азеляненні і навядзенні парадку на зямлі прынялі ўдзел каля 15 тысяч чалавек.  Яны пасадзілі больш за 50 тысяч маладых дрэў.

Старшыня Магаблвыканкама Леанід ЗАЯЦ падкрэсліў, што асноўная мэта суботніка – зрабіць нашы населеныя пункты прыгажэй, таму трэба аб’яднаць у важнай справе навядзення парадку на малой радзіме намаганні ўлады і насельніцтва. А талакой лёгка выканаць любую працу.

Аліна ЦЫГАНІЙ.

Фота аўтара, прадастаўленыя ДЛГУ “Бялыніцкі лясгас” і БУКП “Жылкамгас”.