З мэтай папярэджання дарожна–транспартных здарэнняў з удзелам дзяцей, а таксама ў сувязі з пачаткам восеньскіх канікул, па 3 лістапада ў Магілёўскай вобласці праводзіцца Тыдзень дзіцячай бяспекі.

Падчас канікул у дзяцей з’яўляецца шмат вольнага часу, значную частку якога яны будуць праводзіць на вуліцы. На жаль, юныя ўдзельнікі дарожнага руху не заўсёды ўсведамляюць усю ступень небяспекі на дарозе …

З пачатку года на дарогах вобласці з удзелам непаўналетніх зарэгістраваны 40 ДТЗ, у выніку якіх 1 падлетак загінуў, 39 атрымалі траўмы.

10 кастрычніка ў Бабруйску пад коламі аўтамабіля апынуўся 9-гадовы хлопчык. Ён пераходзіў вуліцу на чырвоны сігнал святлафора. У выніку ДТЗ, хлопчык быў траўміраваны і шпіталізаваны ў бальніцу.

14 кастрычніка, таксама ў Бабруйску, кіроўца легкавога аўтамабіля наехаў на 2-гадовае дзіця. Бацька выпусціў яго з поля зроку, і малы выбег на праезную частку дарогі з-за аўтамабіля. Дзіця  атрымала цяжкія траўмы.

Паважаныя вадзіцелі, убачыўшы каля пешаходнага пераходу дзіця, трэба пачаць плаўна зніжаць хуткасць і быць гатовым у любы момант затармазіць. Ні ў якім разе не падганяйце пераходзячых дарогу дзяцей гудкамі альбо святлом фар. Вашы сігналы яны могуць няправільна зразумець ці, горш за тое, – спалохацца.

Пры праездзе дваровых тэрыторый улічвайце, што дзеці могуць нечакана выбегчы з-за прыпаркаваных машын. Яшчэ адно небяспечнае для дзіця месца – зона прыпынку грамадскага транспарту. Тут трэба быць асабліва ўважлівым і вадзіцелям, і пешаходам.

Запомніце: да шасці-сямі гадоў дзецям знаходзіцца на дарозе без дарослых строга забаронена. З ранняга ўзросту выпрацоўвайце ў іх правільныя рэфлексы, што край тратуара, – мяжа, якую можна перасякаць толькі пасля пэўнага алгарытму дзеянняў: спыніўся, паглядзеў па баках і толькі потым можна пераходзіць дарогу.

Трымайце дзіця за руку, калі ідзеце па вуліцы ці знаходзіцеся побач з дарогай. Вучыце дзяцей назіраць. Падчас сумесных прагулак звяртайце іх увагу на працу святлафораў, тлумачце значэнне дарожных знакаў, разметкі, вучыце іх прадбачыць небяспеку.

Увосень на вуліцах яшчэ шмат непаўналетніх аматараў велатранспарту. Паўтарыце з імі правілы бяспечнага катання на веласіпедзе. Нагадайце дзецям ва ўзросце да 14-ці гадоў, што ім забаронена без суправаджэння дарослага кіраваць веласіпедам на дарозе (акрамя пешаходных і жылых зон, тратуараў веласіпедных і пешаходных дарожак).

Не забудзьцеся на флікеры, а лепш набудзьце для велапрагулак камізэльку са святлоадбівальнымі ўстаўкамі і спецыяльны шлем.

Перавозка дзяцей ва ўзросце да 12 гадоў у легкавым аўтамабілі павінна ажыццяўляцца з абавязковым выкарыстаннем дзіцячых утрымліваючых прылад, якія адпавядаюць іх вазе і росту.

Перавозіць дзяцей на каленях нельга. Недапушчальна прышпільваць адным рамянём пасажыра і дзіця ў яго на каленях. Нельга дазваляць дзецям падчас руху станавіцца на ногі, перамяшчацца па салоне. Перад паездкай заблакіруйце дзверы, каб дзіця выпадкова не адкрыла іх у час руху. Адключыце падушкі бяспекі, якія размешчаны насупраць дзіцячага сядзення. Яны разлічаны на дарослага пасажыра, а вось для маленькага ўяўляюць небяспеку. Заўсёды памятайце, што дзіця ў вашай машыне – галоўны пасажыр!

            Аляксандр ЕМЯЛЬЯНАЎ,

            інспектар АДАІ РАУС.