На пасяджэнні калегіі Камітэта дзяржкантролю Магілёўскай вобласці разгледжаны вынікі працы за 2019 год і вызначаны задачы на 2020. У працы калегіі прыняў удзел першы намеснік старшыні Камітэта дзяржкантролю Беларусі Васіль ГЕРАСІМАЎ.

Асноўныя намаганні камітэта ў 2019 годзе былі сканцэнтраваны на арганізацыі прафілактыкі правапарушэнняў, кантролі за эфектыўным выкарыстаннем бюджэтных сродкаў і дзяржмаёмасці, выяўленні рэзерваў павышэння эфектыўнасці дзейнасці галін эканомікі вобласці, выпрацоўцы прапаноў па ўдасканаленні заканадаўства.

Летась дзяржаўнымі кантралёрамі праведзены 43 праверкі і 103 маніторынгі. Па іх выніках вернута ў бюджэт 4,7 млн рублёў, забяспечана кампенсаванне сродкаў дзяржаўным арганізацыям – 15,6 млн рублёў, эканомія дзяржаўных сродкаў склала 25 млн рублёў.

Па матэрыялах камітэта распачаты 74 крымінальныя справы, з іх 31– па выніках сумеснай працы з УДФР КДК Рэспублікі Беларусь па Магілёўскай вобласці. Па выніках кантрольна-аналітычных мерапрыемстваў ад займаемых пасад вызвалены 15 службовых асоб, да адміністрацыйнай адказнасці прыцягнуты 624.

Адным з асноўных напрамкаў дзейнасці камітэта з’яўляўся папераджальны кантроль за выкананнем даручэнняў Прэзідэнта, дзяржаўных, рэгіянальных і галіновых праграм. У гэтых мэтах калегіяй камітэта разгле-джаны 50 тэматычных пытанняў, выпрацаваны канкрэтныя прапановы дзяржаўным органам і суб’ектам гаспадарання. У мясцовыя органы ўлады і кіравання накіраваны 389 інфармацый з прапановамі і для прыняцця мер. Праведзены 24 аўдыты эфектыўнасці, у тым ліку па пытаннях жыллёва-камунальнай гаспадаркі, інавацыйнага развіцця Магілёўскай вобласці, развіцця малога прадпрымальніцтва, сельскай гаспадаркі, эфектыўнасці выкарыстання дзяржаўнай маёмасці.

Важнае месца надавалася рабоце са зваротамі грамадзян. Працягвалася практыка правядзення сумесных асабістых прыёмаў і прамых ліній старшынёй камітэта і пракурорам вобласці.

Па выніках кантролю і разгляду зваротаў да адміністрацыйнай адказнасці прыцягнуты 32 службовыя асобы, да дысцыплінарнай – 21, з іх 1 вызвалены ад займаемай пасады, праваахоўнымі органамі ўзбуджаны 2 крымінальныя справы.

Калегіяй адзначана, што ў бягучым годзе камітэт працягне кантроль за выкарыстаннем мясцовых бюджэтаў, дзяржаўнай маёмасці, рэалізацыяй найважнейшых інвестыцыйных і інавацыйных праектаў, ходам правядзення мадэрнізацыі валаўтваральных прадпрыемстваў, выкананнем зямельнага, ляснога і прыродаахоўнага заканадаўства, заканадаўства ў сферы дзяржзакупак. Працягнецца маніторынг сітуацыі ў сельскай гаспадарцы, будаўнічым комплексе і ЖКГ, на рынку працы.

Пасля пасяджэння калегіі падчас рабочай паездкі ў Магілёўскую вобласць Васіль Герасімаў наведаў адно са значных прадпрыемстваў абласнога цэнтра – ААТ “Магілёўліфтмаш”, дзе азнаёміўся з дзейнасцю таварыства і яго перспектывамі развіцця.

     Алег САДОЎСКІ,

     старшыня Камітэта дзяржкантролю Магілёўскай вобласці.