З 10 красавіка ўступіла ў сілу пастанова Савета Міністраў Беларусі аб увядзенні на тэрыторыі краіны на перыяд распаўсюджання каранавіруснай інфекцыі абмежавальнага мерапрыемства –

самаізаляцыі.

Абмежаванні датычацца грамадзян Беларусі, іншаземцаў, асоб без грамадзянства, якія прыбываюць у краіну з дзяржаў з неспрыяльнай эпідсітуацыяй па COVID-19, мелі (маглі мець) кантакты з асобамі, у якіх выяўлены інфекцыйныя захворванні (1 і 2 узроўняў) ці яны з’яўляюцца носьбітамі ўзбуджальнікаў гэтых інфекцый, а таксама людзей, якія знаходзяцца ў стадыі выздараўлення пасля перанесеных інфекцыйных захворванняў.

Тэрмін самаізаляцыі – ад 14 дзён у грамадзян, якія прыбылі з-за мяжы, і кантактаў першага ўзроўню. У кантактаў другога ўзроўню – пры выяўленні аднаго альбо некалькіх рэспіраторных сімптомаў на перыяд іх наяўнасці. Па рашэнні ўрача тэрмін самаізаляцыі можа быць прадоўжаны.

Усім жыхарам раёна, хто знаходзіцца на самаізаляцыі, уручаны патрабаванні, каб яны заставаліся дома, растлумачаны правілы знаходжання на самаізаляцыі. Супрацоўнікі райЦГЭ і міліцыі наведваюць падуліковых грамадзян, правяраюць, як яны выконваюць рэжым. Да адной з такіх паездак далучылася і карэспандэнт раённай газеты “Зара над Друццю”.

Члены рэйдавай групы з райЦГЭ і РАУС наведалі жыхароў сельскіх населеных пунктаў Ланькаўскага сельсавета, якія нядаўна вярнуліся з Расійскай Федэрацыі. 14 красавіка ім былі ўручаны паведамленні аб самаізаляцыі.

– Стараюся як мага меней бываць на вуліцы, нікуды не выходжу, – паведаміў удзельнікам рэйдавай групы Дзмітрый А.

– Сачыце за сваім здароўем, неадкладна паведамляйце, калі раптам з’явяцца сімптомы прастуднага захворвання, – папярэджвае яго памочнік урача-гігіеніста Алена ПАЛУДА. – І, выходзячы на вуліцу, апранайце маску.

– Мы папярэджваем грамадзян аб тым, каб яны абмяжоўвалі свае кантакты, наведвалі грамадскія месцы: аптэку ці бліжэйшы прадуктовы магазін толькі ў выпадку крайняй неабходнасці, – тлумачыць Алена Аляксандраўна. – Мера гэта вымушаная, але, між тым, дзейсная. У першую чаргу звяртаемся да свядомасці людзей, якія павінны самаізалявацца, бо яны, самі таго не ведаючы, могуць быць пераносчыкамі інфекцыі. Тыя, хто парушае рэжым самаізаляцыі, прыцягваюцца да адміністрацыйнай адказнасці.

У асноўным, па словах Алены Палуда, амаль усе падуліковыя грамадзяне выконваюць патрабаванні медыкаў і санстанцыі. Але часам выяўляюцца і парушальнікі абмежавальнага рэжыму.  Падчас рэйдавай праверкі двух жыхароў з               в. Лубяны і аг. Іскра, якія павінны былі знаходзіцца на самаізаляцыі, па месцы жыхарства не аказалася. Калі ж іх месцазнаходжанне было ўстаноўлена, патлумачыць свае дзеянні яны не змаглі. У адносінах да іх праваахоўнікі распачалі адміністрацыйны працэс па арт. 23.4 КаАП РБ.

Усяго па стане на 20 красавіка праваахоўнікамі выяўлены 4 парушэнні рэжыму самаізаляцыі. Адміністрацыйныя працэсы распачаты па арт. 23.4 КаАП у адносінах да чатырох жыхароў раёна.

Згодна арт. 16.8 КаАП, парушэнне санітарна-эпідэміялагічных, гігіенічных патрабаванняў і працэдур цягнуць накладанне штрафу памерамі да 30 бв. А непадпарадкаванне законнаму распараджэнню ці патрабаванню службовай асобы дзяржаўнага органа пры выкананні ёй службовых паўнамоцтваў, згодна арт. 23.4 КаАП, караецца штрафам, памерам ад 2 да 50 бв ці адміністрацыйным арыштам. Тым, хто афіцыйна працаўладкаваны і не парушае рэжым самаізаляцыі, аплачваецца лісток непрацаздольнасці. Калі ж выяўляюцца парушэнні, то аплата “бальнічнага” зніжаецца на 50%.

Святлана МАГІЛЕЎЧЫК.

Фота аўтара.