Штогод у трэцюю нядзелю чэрвеня сваё прафесійнае свята адзначаюць медыцынскія работнікі. Сёлета, у перыяд пандэміі каранавіруса, калі медыкі аказаліся на “перадавой” барацьбы з COVID-19, гэты дзень набывае асаблівае значэнне.

У нялёгкі эпідэміялагічны перыяд часова пакінулі свае працоўныя месцы і перайшлі працаваць у ЦРБ маладыя ўрачы Святлана СІДАРЭНКА і Анастасія КОТАВА.

Святлана Леанідаўна нарадзілася і вырасла ў аг. Вішоў, Анастасія Віктараўна родам з Быхава. Пасля заканчэння ў 2018 годзе Гомельскага дзяржаўнага медыцынскага ўніверсітэта маладыя медыкі атрымалі першыя працоўныя месцы ў нашым раёне ў якасці загадчыц, адпаведна, Галоўчынскай і Запольскай амбулаторый урача агульнай практыкі. Як прызнаюцца дзяўчыны, дзякуючы падтрымцы кіраўніцтва ЦРБ, чулым адносінам і разуменню калектываў амбулаторый першыя два гады працы, калі ўчарашні выпускнік так моцна мае патрэбу ў прафесійнай адаптацыі, прайшлі на адным дыханні.

А некалькі месяцаў таму звыклы парадак працы ў тым ліку і медыкаў нашага раёна змяніўся на рэжым знаходжання ў пастаяннай “баявой” гатоўнасці.

На працягу некалькіх апошніх тыдняў Святлана Сідарэнка і Анастасія Котава аказвалі дапамогу пацыентам з COVID-19 у тэрапеўтычным аддзяленні райбальніцы. Навіну аб тым, што ў складаны для ўсіх перыяд трэба аб’яднацца ў барацьбе з гэтай хваробай, успрынялі з мужным спакоем.

– Адзінае, што ў першыя дні даводзілася надоўга затрымлівацца на працы, пакуль поўнасцю не ўвайшла ў курс справы, – распавядае Святлана Сідарэнка, якая днямі прыступіла да сваіх ранейшых працоўных абавязкаў. – Аднак, ізноў жа, сіла і моц каманднага духу, калі кожны адчувае сваю адказнасць за здароўе людзей, нягледзячы на ўсе складанасці, дапамагла паспяхова справіцца з ускладзенымі на нас абавязкамі. Найбольшы дыскамфорт прыносяць сродкі індывідуальнай абароны – рэспіратары, шчыткі, ахоўныя касцюмы, у якіх, асабліва ў летнюю спёку, знаходзіцца вельмі цяжка. Аднак мы разумеем, што павінны сябе берагчы, каб мець магчымасць працягваць зберагаць здароўе і жыцці нашых грамадзян.

Шчырае жаданне дапамагаць хворым і кожны выпісаны з бальніцы пацыент натхняюць маладых медыкаў пераадольваць складанасці і надаюць ім энергію для далейшай барацьбы з пандэміяй.

– Канечне, усе ўжо стаміліся і хочацца ўздыхнуць свабодна, – кажа Анастасія Котава. – Аднак, назіраючы за станоўчай дымамікай пацыентаў і кожным поўным іх выздараўленнем, адчуваеш новыя сілы і ўпэўненасць у паступовай перамозе над гэтай хваробай.

Калектыў рэдакцыі газеты шчыра віншуе з прафесійным святам работнікаў сістэмы аховы здароўя раёна.

Шчыра жадаем усім, хто выбраў сваім жыццёвым шляхам штодзённы клопат аб здароўі і жыццях людзей, дасягнення значных поспехаў у вашай адказнай і важнай справе, бадзёрасці і аптымізму, міру і дабрабыту, моцнага здароўя.

     Вольга НАБОКАВА.

Фота аўтара і Святланы МАГІЛЕЎЧЫК.