Крок за крокам бліжэй да важнай даты
Пасяджэнне абласнога арганізацыйнага камітэта па падрыхтоўцы і правядзенні XXVII Дня беларускага пісьменства прайшло ў Бялынічах.
Удзел у ім прынялі старшыня аблвыканкама Леанід ЗАЯЦ, намеснікі яго Валерый МАЛАШКА і Сяргей МАСЛАЎ, прадстаўнікі ўпраўленняў аблвыканкама, абласных устаноў, органаў і служб.
Аб мерапрыемствах па добраўпарадкаванні і падрыхтоўцы аб’ектаў да Дня пісьменства прысутным падрабязна распавёў старшыня райвыканкама Васіль ЗАХАРЭНКА.
Як адзначыў кіраўнік раёна, падрыхтоўка аб’ектаў да свята ідзе па зацверджаным плане. На большасці з іх работы поўнасцю завершаны. Цяпер будоўля знаходзіцца на этапе выпраўлення выяўленых недахопаў і недапрацовак.
Таксама на пасяджэнні былі абмеркаваны пытанні арганізацыі грамадскай бяспекі, гандлю і харчавання. Дарэчы, падчас свята па вуліцы Савецкая будзе арганізавана праца гандлёвых аб’ектаў трыццаці суб’ектаў гаспадарання, у тым ліку ААТ “Бабуліна крынка”, “Александрыйскае”, “Чырвоны харчавік”, “Камунарка”, Магілёўскай фабрыкі марожанага, аб’ектаў спажыўкааперацыі і многіх іншых. Для камфортных умоў удзельнікаў свята ў рамках працы гандлёвых кропак прадугледжана не менш за 600 пасадачных месцаў.
З падрабязнасцямі праекта праграмы правядзення XXVII Дня беларускага пісьменства прысутных азнаёміла начальнік галоўнага ўпраўлення ідэалагічнай работы і па справах моладзі аблвыканкама Кацярына МУЗЫЧЭНКА. Яна змястоўна распавяла аб актуальных тэмах, што знойдуць адлюстраванне падчас Дня пісьменства ў Бялынічах, а менавіта: “Трылогія пад знакам Года малой радзімы ў Беларусі”, “Гісторыка-духоўная, культурна-асветніцая і мастацкая спадчына Магілёўшчыны”, “75-годдзе Перамогі савецкага народа ў Вялікай Айчыннай вайне” і “90-годдзе з дня нараджэння Уладзіміра Караткевіча”. Выступоўца паведаміла, што праграма свята традыцыйна пачнецца з навукова-асветніцкай экспедыцыі “Дарога да святыняў” з перадачай жыватворнага агню з Храма Гроба Гасподняга”. Распрацаваны таксама план духоўна-асветніцкага праекта “Дакрануцца да духоўнасці”, які будзе прадстаўлены выставай лепшых здабыткаў нацыянальнай літаратуры нацыянальна-культурных аб’яднанняў, літаратурна-тэатралізаванай інтэрактыўнай пляцоўкай тэматычных экспазіцый бібліятэк Магілёўшчыны, канцэртам духоўнай музыкі, чытаннем паэзіі аднаго з першых літаратараў Бялыніцкага краю іераманаха Васілія (Жудро). Цырымонія адкрыцця XXVII Дня беларускага пісьменства з уручэннем Нацыянальнай літаратурнай прэміі адбудзецца апоўдні 6 верасня на галоўнай сцэнічнай пляцоўцы свята каля раённага мастацкага музея імя В.К. Бялыніцкага-Бірулі, які ў гэты дзень урачыста адкрые свае дзверы для наведвальнікаў. На працягу дня будуць працаваць шматлікія мастацкія выставы-вернісажы, інтэрактыўныя пляцоўкі, тэматычныя экспазіцыі, прэзентацыі, арганізаваны майстар-класы, бліц-конкурсы сямейнай творчасці, дзіцячыя святы і атракцыёны, карнавалы, прадстаўлены тэатралізавана-музычныя праекты, канцэртныя выступленні і паказ-дэфіле беларускіх калекцый адзення.
Увечары ўсіх удзельнікаў урачыстасцяў чакае святочны феерверк. (З падрабязнай праграмай можна будзе азнаёміцца ў наступных выпусках “Зары над Друццю”).
Пасля пасяджэння губернатар наведаў аб’екты інфраструктуры горада, якія падлягалі рэканструкцыі да свята.
Дзень беларускага пісьменства пройдзе ў Бялынічах 5-6 верасня.
Вольга НАБОКАВА.
Фота аўтара.