У ААТ “Аграсэрвіс”, дзе пабывала карэспандэнт раёнкі, падрыхтоўка глебы пад будучы ўраджай ідзе поўным ходам.

Як паведаміла галоўны аграном гаспадаркі Анастасія СТАРАВОЙТАВА, восеньская апрацоўка глебы – важны тэхналагічны прыём, які дапамагае змагацца з пустазеллем і прадухіляе яго з’яўленне, памяншае выдаткі на хімічную апрацоўку глебы і павышае яе ўраджайнасць.

На ўзняцці зябліва заняты вопытны механізатар Яўген ЗАЛАТУХІН, які з веданнем справы працуе ў полі на МТЗ-3022. Як распавёў трактарыст, за дзень ён узворвае да 20-25 гектараў пры дзённай норме 14. Вопыту яму не займаць, бо ўсё жыццё аддаў працы на зямлі. Шчыраваць часам даводзіцца практычна да цямна, але, як адзначыў суразмоўца, ён ужо да гэтага прызвычаіўся: галоўнае, каб было добрае надвор’е.

– Зусім няшмат часу засталося да зімы, вось тады і буду адпачываць, – кажа механізатар. – А пакуль трэба максімальна якасна падрыхтаваць глебу да веснавой сяўбы, бо сёння працую на будучы ўраджай.

                           Аліна ЦЫГАНІЙ.

                           Фота аўтара.