У чацвёрты раз конкурс прафесійнага майстэрства “Магілёўскі майстар” сярод вадзіцеляў смеццявозаў жыллёва-камунальных гаспадарак Прыдняпроўскага краю прайшоў на базе абласнога аўтадрома ДТСААФ.

Арганізатарам конкурсу з’яўляецца абласная арганізацыя Беларускага прафсаюза работнікаў мясцовай прамысловасці і камунальна-бытавых прадпрыемстваў. А сёлетнімі ўдзельнікамі прафесійнага спаборніцтва сталі 20 вадзіцеляў спецмашын прадпрыемстваў жыллёва-камунальнай гаспадаркі з усіх рэгіёнаў Магілёўшчыны. Сярод іх быў і вадзіцель смеццявоза БУКП “Жылкамгас” Уладзімір КАЗЛОЎ. Да слова сказаць, Уладзімір Васільевіч удзельнічае ў гэтым конкурсе з пачатку яго правядзення і нязменна займае прызавыя месцы. Не выключэннем стаў для яго і сёлетні. Але аб усім па парадку.

Канкурсантам трэба было прайсці два этапы прафесійнага спаборніцтва: тэарэтычны і практычны. Заданні першага этапа ўключалі ў сябе дэманстрацыю ведання Правілаў дарожнага руху, майстэрства выкарыстання тэхналагічных прылад і тэхнічнага абслугоўвання аўтамабіля. На другім яго ўдзельнікі паказвалі ўласныя навыкі кіравання смеццявозам.

– На аўтадроме абласнога ДТСААФ, – распавёў журналісту газеты Уладзімір Казлоў, – вадзіцелі дэманстравалі некалькі элементаў кіравання: габарытную змейку, рух па габарытным тунэлі, пастаноўку аўтамабіля заднім ходам у бокс, дыяганальную паркоўку і іншыя.

Па інфармацыі старшыні Магілёўскага абласнога камітэта Беларускага прафсаюза работнікаў мясцовай прамысловасці і камунальна-бытавых прадпрыемстваў Паўла ЖУЙКОВА, сваё прафесійнае майстэрства паказвалі як вопытныя вадзіцелі смеццявозаў, так і тыя, хто нядаўна прыйшоў у гэту прафесію. Да слова сказаць, для ўдзелу ў конкурсе няма ўзроставых абмежаванняў. Дзейнічае толькі адна абавязковая ўмова: адсутнасць у вадзіцеля за апошні год фактаў ДТЗ, парушэнняў працоўнай і вытворчай дысцыпліны.

Па дамоўленасці з кіраўніцтвам Мінскага аўтамабільнага завода ўдзельнікі конкурсу змаглі пазнаёміцца і з новымі ўзорамі спецтэхнікі айчыннай вытворчасці.

Уладзімір Казлоў у конкурсе прафесійнага майстэрства “Магілёўскі майстар” 2020 года сярод вадзіцеляў смеццявозаў жыллёва-камунальных гаспадарак па выніках двух яго этапаў заняў ганаровае ІІІ месца. Таксама ён адзначаны і Дыпломам ІІ ступені па веданні Правілаў дарожнага руху.

Пераможцы спаборніцтваў узнагароджаны дыпломамі, грашовымі прэміямі і каштоўнымі падарункамі.

– Акрамя таго, кіраўнікам арганізацый, чые супрацоўнікі атрымалі перамогу ў конкурсе, рэкамендавана ўстанавіць надбаўкі да тарыфных акладаў за прафесійнае майстэрства: за 1-е месца – 15%, 2-е месца – 10% і 3-е – 5%, – адзначыў Павел Жуйкоў.

Уладзімір Казлоў расказаў, што ўдзел у конкурсе “Магілёўскі майстар” стымулюе яго на дасканалае авалоданне выбранай прафесіяй, асваенне сучасных тэхналогій.

Міхась КАРПЕЧАНКА.

Фота