І розумам, і сэрцам у барацьбе за жыццё
Барацьба грамадства з каранавіруснай інфекцыяй ідзе кожны дзень. Міністэрства аховы здароўя Беларусі вядзе строгі ўлік захварэлых і тых, хто справіўся з гэтым нядугам. На жаль, статыстыку памерлых ад каварнага віруса ніхто не адмяняў. Па стане на 1 чэрвеня на тэрыторыі нашай краіны зафіксавана 394 тысячы выпадкаў заражэння, 385 тысяч чалавек паправіліся, памерла 2851 чалавек.
У Бялыніцкім раёне актыўна працягваецца вакцынацыя супраць СOVID-19. ЦРБ прапануе жыхарам раёна расійскую вакцыну беларускага разліву «Спадарожнік-V» (ГамКОВИД-Вак), а таксама кітайскую Vero Cell кампаніі Senopharm. Прышчэпкі робяцца на бясплатнай аснове. Жадаючыя могуць звярнуцца ў раённую паліклініку асабіста або атрымаць кансультацыю па тэлефоне.
Па словах галоўнага ўрача ЦРБ Паўла МАНЬКО, насельніцтву раёна прадастаўлена магчымасць атрымаць якасную паслугу з мінімальнай рызыкай для здароўя.
Першымі прышчэпленымі сярод супрацоўнікаў раённай бальніцы стала так званая група рызыкі – персанал двух аддзяленняў: рэанімацыі і анестэзіялогіі (загадчык – Аляксандр КЛЕШЧАНОК) і тэрапеўтычнага (загадчык – Таццяна САКУЛЬСКАЯ). Зараз усе яны адчуваюць сябе добра і працягваюць працаваць на сваіх месцах у штатным рэжыме.
– Увогуле, агульная колькасць прышчэпленых сярод урачоў і медыцынскіх работнікаў раёна складае 85%, – дадае Павел Аляксандравіч. – Па стане на 1 чэрвеня прышчэпку супраць гэтага захворвання атрымала 1110 чалавек (першы этап вакцынацыі), што складае 7,6% ад агульнай колькасці насельніцтва раёна, якая падлягае вакцынацыі.
У першую чаргу вакцыніруюцца медыкі, настаўнікі, работнікі гандлю, сацыяльных паслуг, людзі сталага ўзросту (больш за 60 гадоў), з хранічнымі захворваннямі.
Сярод жыхароў нашага рэгіёна актыўна вядзецца растлумачальная работа па пытаннях грамадскай імунізацыі і вакцынацыі супраць СOVID-19. Жадаючыя прышчапіцца могуць звярнуцца ў паліклініку за атрыманнем вакцыны, а калі гэта сельская мясцовасць, то ў сваю ўрачэбную амбулаторыю або ФАП, дзе з імі правядуць гутарку і вызначаць час, калі будзе выканана працэдура. Падрабязны матэрыял па тэме «Вакцынацыя ў пытаннях і адказах» вы можаце знайсці ў нашай газеце ў №28 ад 10 красавіка 2021 года. Зразумела, што ёсць тыя, каму такая прышчэпка супрацьпаказана.
Нагадаем, што працэс вакцынацыі супраць каранавіруса праходзіць у два этапы: увядзенне двух кампанентаў вакцыны з інтэрвалам у 21 дзень.
– На сенняшні дзень у ЦРБ наяўнасць вакцыны супраць СOVID-19 складае 390 доз. Ёсць магчымасць папярэдняга запісу, – паведаміў галоўны ўрач ЦРБ. – На бягучым тыдні плануецца вакцынацыя сельскага насельніцтва. Райбальніцай закуплены спецыяльныя тэрмакантэйнеры з холадаэлементамі, што дае магчымасць транспарціраваць вакцыну ў адпаведных для гэтага ўмовах. Практыка выязной вакцынацыі ў спецыялістаў раённай бальніцы ўжо ёсць.
Павел Аляксандравіч адзначае, што колькасць інфіцыраваных каранавірусам з наяўнасцю цяжкай формы пнеўманіі, павялічылася ў параўнанні з мінулым годам. Сярэднясутачна выяўляецца 1-2 выпадкі станоўчых рэзультатаў на кавід.
Адзначым, што з 27 мая пачалася выдача сертыфікатаў аб вакцынацыі супраць інфекцыі СOVID-19 на платнай аснове. Яго выдае толькі райпаліклініка.
Каб дасягнуць максімальна спрыяльных умоў для супрацьдзеяння распаўсюджванню каранавіруснай інфекцыі, трэба ўсвядоміць, што прышчэпкі – адзіны дзейсны сродак у барацьбе з пандэміяй і прадухілення новых надзвычайных сітуацый.
У заключэнні хочацца сказаць: «Сэрца баліць за тых, хто не змог справіцца з вераломнымі наступствамі віруса, а розум сцвярджае, што трэба зрабіць усё, каб спыніць і больш не дапусціць такой праверкі на трываласць усяго чалавецтва.
МЕРКАВАННЕ:
Жанна ВАРАБ’ЁВА, бялынічанка.
– Напачатку, як толькі на месцы працы паведамілі, што будуць рабіць прышчэпкі, нервавалася, бо за мінулы год перахварэла СOVID-19 аж два разы. Розум казаў: «Жанна, трэба рабіць прышчэпку, бо кожны дзень жыццё падвяргаецца небяспецы». Вельмі перажывала, калі чула трагічныя звесткі пра знаёмых, якіх ужо няма. Былі і тыя, хто адмоўна ставіўся да такой працэдуры, аргументуючы, што ніхто дасканала не ведае, што гэта за вакцына. Для сябе прыняла рашэнне вакцынавацца і не шкадую. Перанесла прышчэпку добра, ніякага дыскамфорту не было. Знаёмым і суседзям таксама рэкамендую яе зрабіць.
Уважаемые пациенты!
Чтобы привиться против COVID-19 необходимо предварительно записаться по телефонам в рабочие дни: с 8.00 до 18.00
РЕГИСТРАТУРА: 8(02232) 78-929; 8(02232) 78-080.
Колл-центр: 8(02232)78-160.
В дальнейшем с вами свяжется медицинский работник.
Наталля БАРОДЗЬКА.
Фота аўтара.